കണ്ണൂർ: കസ്റ്റംസിന്റെ കണ്ണ് വെട്ടിച്ച് വിമാനത്താവളം വഴി കടത്താൻ ശ്രമിച്ച സ്വർണം പോലീസ് പിടികൂടി. ശരീരത്തിൽ ഒളിപ്പിച്ച് കടത്താൻ ശ്രമിച്ച സ്വർണമാണ് പിടികൂടിയത്. സംഭവത്തിൽ കൂത്ത്പറമ്പ് സ്വദേശി നസീം അഹമ്മദിനെ പോലീസ് പിടികൂടി.
രാവിലെയോടെയായിരുന്നു സംഭവം. കസ്റ്റംസ് പരിശോധന കഴിഞ്ഞ വിമാനത്താവളത്തിന് പുറത്തെത്തിയപ്പോഴാണ് ഇയാളെ പോലീസ് പിടികൂടിയത്. ഇയാളിൽ നിന്നും സ്വർണം കൈപ്പറ്റുന്നതിനായി രണ്ട് പേർ എയർപോർട്ട് പരിസരത്ത് എത്തിയിരുന്നു. ഇത് പോലീസിന്റെ ശ്രദ്ധയിലും പെട്ടിരുന്നു. ഇതിനിടെയായിരുന്നു സ്വർണവുമായി നസീം വിമാനത്താവളത്തിന് പുറത്ത് എത്തിയത്. തുടർന്ന് പോലീസ് ഇയാളെ ചോദ്യം ചെയ്യാൻ വിളിപ്പിച്ചു. ഇതോടെ സ്വർണം വാങ്ങാൻ എത്തിയ രണ്ട് പേർ സ്ഥലം വിട്ടു. ഇതിന് പിന്നാലെ നടത്തിയ പരിശോധനയിലാണ് സ്വർണം കണ്ടെത്തിയത്.
ക്യാപ്സൂൾ രൂപത്തിലാക്കി മലദ്വാരത്തിൽ ഒളിപ്പിച്ച് കടത്താൻ ശ്രമിച്ച സ്വർണമാണ് പിടികൂടിയത്. 850 ഗ്രാം സ്വർണം ഇയാളുടെ പക്കൽ നിന്നും പിടികൂടിയതായി പോലീസ് പറഞ്ഞു. ഇതിന് വിപണിയിൽ 38 ലക്ഷം രൂപ വിലവരും. അടുത്തകാലത്ത് ഇത് ആദ്യമായാണ് കണ്ണൂർ വിമാനത്താവളത്തിലെ കസ്റ്റംസിനെ വെട്ടിച്ചുകൊണ്ടുവരുന്ന സ്വർണം പോലീസ് പിടികൂടുന്നത്.
അതേസമയം ഇന്നലെയും കണ്ണൂർ വിമാനത്താവളം വഴി സ്വർണം കടത്താൻ ശ്രമിച്ചിരുന്നു. ഒരു കോടി 4 ലക്ഷം രൂപയുടെ സ്വർണമാണ് പിടികൂടിയത്.
