ഹൈദരാബാദ് : തിരുപ്പതി ദർശനത്തിനിടെ ക്ഷേത്ര പരിസരത്ത് ചെരുപ്പ് ധരിച്ച് കയറിയ സംഭവത്തിൽ ഖേദം പ്രകടിപ്പിച്ച് വിഘ്നേഷ്-നയൻതാര ദമ്പതികൾ. ക്ഷേത്ര അധികൃതർക്ക് നൽകിയ കത്തിലൂടെയാണ് ഇരുവരും ക്ഷമാപണം നടത്തിയത്. അനാദരവ് കാണിക്കാൻ ഉദ്ദേശിച്ചിരുന്നില്ലെന്ന് കത്തിൽ വ്യക്തമാക്കിയിട്ടുണ്ട്.
തങ്ങൾ സ്നേഹിക്കുന്ന ദൈവത്തോട് അനാദരവ് കാണിക്കാൻ ഉദ്ദേശിച്ചിരുന്നില്ല. ഇതിൽ ആർക്കെങ്കിലും വേദന തോന്നിയെങ്കിൽ ക്ഷമ ചോദിക്കുന്നതായി വിഘ്നേഷ് ശിവൻ കത്തിൽ പറഞ്ഞു. ധൃതിയിൽ ചിത്രം പകർത്തുന്നതിനായി ക്ഷേത്രത്തിലേക്ക് കയറുന്നതിനിടെ ചെരുപ്പ് ധരിച്ചത് ശ്രദ്ധിച്ചില്ലെന്ന് കത്തിൽ ചൂണ്ടിക്കാട്ടുന്നുണ്ട്. തങ്ങൾ വിശ്വാസികളാണെന്നും സ്ഥിരമായി ക്ഷേത്ര ദർശനം നടത്താറുണ്ടെന്നും വിഘ്നേഷ് ശിവൻ പറഞ്ഞു.
ക്ഷേത്ര പരിസരത്ത് താരങ്ങൾ ചെരുപ്പ് ധരിച്ച് പ്രവേശിച്ചതിന് ക്ഷേത്ര അധികൃതർ ഇരുവർക്കും ലീഗൽ നോട്ടീസ് അയക്കാൻ തീരുമാനിച്ചിരുന്നു. ഇതിന് പിന്നാലെയാണ് ഇരുവരും ഖേദം പ്രകടിപ്പിച്ചെത്തിയത്. ജൂൺ 9 ന്മഹാബലിപുരത്ത് നടന്ന വിവാഹ ചടങ്ങിന്റെ അടുത്ത ദിവസമാണ് ഇരുവരും തിരുപ്പതി ക്ഷേത്രത്തിൽ എത്തി ദർശനം നടത്തിയത്.
