സഞ്ജു ഇംഗ്ലണ്ടിനെതിരെയും കളിക്കാനിറങ്ങിയേക്കും; അവസരം അയർലാന്റ് ടീമിൽ ഇടം പിടിച്ചതിന് പിന്നാലെ

മുംബൈ: മലയാളിതാരം സഞ്ജു സാംസണിന് ഇരട്ട അവസരങ്ങളുടെ വാതിൽ തുറക്കുന്നു. അയർലാന്റിലേയ്‌ക്കുള്ള ടീമിൽ ഇടം നേടിയ രാജസ്ഥാൻ റോയൽസ് നായകൻ മിക്കവാറും ഇംഗ്ലണ്ടിനെതിരേയും ബ്രിട്ടണിൽ കളിക്കാനിറങ്ങുമെന്നാണ് സൂചന. അയർലാന്റിൽ പര്യടനത്തിനെത്തുന്ന ടീം ഇന്ത്യയുമായി പരമ്പര കളിക്കാൻ ഇംഗ്ലണ്ട് തീരുമാനിച്ചതാണ് സഞ്ജുവിനും ഗുണമാകാൻ പോകുന്നത്.

അയർലാന്റിലേയ്‌ക്കുള്ള ടീമിൽ ഇടം നേടിയെങ്കിലും വിക്കറ്റ് കീപ്പറായിട്ടല്ല ടീമിലെടുത്തത് എന്നതാണ് ആരാധകരെ നിരാശരാക്കുന്നത്. ഋതുരാജ് ഗെയ്‌ക്ക്വാദ്, ഇഷാൻ കിഷൻ, ദിനേശ് കാർത്തിക്, സൂര്യകുമാർ യാദവ്, ഹാർദ്ദിക് പാണ്ഡ്യ എന്നിവർ പരമ്പരയിലുള്ളപ്പോൾ ഏത് സ്ലോട്ടിൽ സഞ്ജുവിറങ്ങും എന്നതാണ് സംശയം.

അയർലാന്റിനെതിരെ രണ്ട് ടി20 പരമ്പരയ്‌ക്കാണ് ടീം പുറപ്പെടുന്നത്. ഋഷഭ് പന്തിനും ശ്രേയസ് അയ്യർക്കും വിശ്രമം അനുവദിച്ചപ്പോഴാണ് സഞ്ജുവും പുതുമുഖം രാഹുൽ ത്രിപാഠിയും സൂര്യകുമാറും ടീമിലെത്തിയത്. എന്നാൽ അയർലാന്റിനെതിരെ കളിക്കുന്ന അതേ ടീമിനെ ഇംഗ്ലണ്ടിനെതിരെ മൂന്ന് ടി20 കളിക്കാനും നിലനിർത്തുമെന്ന് ഉറപ്പായിട്ടുണ്ട്. ഹാർദ്ദിക് പാണ്ഡ്യയാണ് അയർലാന്റ്-ഇംഗ്ലണ്ട് പരമ്പരയിൽ ടീം ഇന്ത്യയുടെ നായകൻ.