ലക്‌നൗ: വിദ്യാർത്ഥികൾക്ക് മാർഗനിർദ്ദേശങ്ങൾ പകർന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. പത്രങ്ങൾ വായിക്കാനും വായനശാലകൾ സന്ദർശിക്കാനും അദ്ദേഹം നിർദ്ദേശിച്ചു. വായനാശീലം മത്സരപരീക്ഷകൾക്ക് സഹായമാകുമെന്നും ജീവിതത്തിന് കൃത്യമായ ഒരു ലക്ഷ്യം കൈവരുമെന്നും അദ്ദേഹം ചൂണ്ടിക്കാട്ടി.
പ്ലസ്ടു പരീക്ഷയിൽ മികച്ചവിജയം നേടിയ 10 വിദ്യാർത്ഥികളുമായി സംസാരിക്കുന്നതിനിടെയാണ് അദ്ദേഹം വായനാശീലത്തിന്റെ പ്രാധാന്യം വിദ്യാർത്ഥികളെ ഓർമ്മപ്പെടുത്തിയത്. മുഖ്യമന്ത്രിയുടെ വസതിയിൽ വെച്ചായിരുന്നു കൂടിക്കാഴ്ച. ഉപമുഖ്യമന്ത്രി ബ്രജേഷ് പതക്കും മറ്റ് മന്ത്രിമാരും ചർച്ചയിൽ പങ്കെടുത്തു.
വിദ്യാർത്ഥികൾ മത്സരപരീക്ഷയ്‌ക്ക് തയ്യാറെടുക്കുന്ന രീതികളെ കുറിച്ച് ആരാഞ്ഞ അദ്ദേഹം വിദ്യാർത്ഥികളെ അഭിനന്ദിക്കുകയും ചെയ്തു.
മത്സര പരീക്ഷകൾക്കായി വിദ്യാർത്ഥികളെ സജ്ജരാക്കുന്ന സംസ്ഥാന സർക്കാരിന്റെ അഭ്യുദയ പദ്ധതിയെ കുറിച്ച് അദ്ദേഹം വിദ്യാർത്ഥികൾക്ക് വിശദീകരിച്ച് നൽകി. തുടർപഠനത്തിന് എല്ലാ സഹായവും നൽകുമെന്ന് ഉറപ്പ് നൽകിയാണ് മുഖ്യമന്ത്രി വിദ്യാർത്ഥികളെ തിരിച്ചയച്ചത്.
