കോഴിക്കോട്: യോഗയുടെ പ്രചാരത്തിനായി ലഡാക്കിലേക്ക് ഒരു സോളോ ട്രിപ്പ്. അതും സൈക്കിളിൽ. അഗ്രിമ നായർ എന്ന മലയാളി പെൺകുട്ടിയാണ് ഈ വെല്ലുവിളി ഏറ്റെടുത്തിരിക്കുന്നത്. അന്താരാഷ്ട്ര യോഗ ദിനത്തിൽ കൊച്ചിയിൽ നിന്ന് തുടങ്ങിയ യാത്ര കോഴിക്കോട് പിന്നിട്ടു. പോകുന്ന വഴിയിൽ യോഗ പറഞ്ഞും പഠിപ്പിച്ചുമാണ് അഗ്രിമയുടെ യാത്ര.
ആരോഗ്യം യോഗയിലൂടെ എന്ന സന്ദേശം പ്രചരിപ്പിച്ചാണ് അഗ്രിമയുടെ സഞ്ചാരം. ആദ്യമായാണ് ഒരു മലയാളി വനിത യോഗ സന്ദേശവുമായി 3500 കിലോമീറ്ററിലേറെ ഒറ്റയ്ക്ക് സൈക്കിളിൽ യാത്ര ചെയ്യുന്നത്. നഗര, ഗ്രാമങ്ങളിലൂടെ യാത്രയിലുടനീളം യോഗ പരിശീലനം നൽകും. യുവതീ യുവാക്കളിലേക്ക് സന്ദേശമെത്തിക്കുവാനാണ് ശ്രമം.
ലഡാക്കിൽ പോകണമെന്ന് ചിന്തിച്ചപ്പോൾ സൈക്ലിംഗ് തുടങ്ങുകയായിരുന്നുവെന്ന് അഗ്രിമ പറഞ്ഞു.
ഗ്രാമങ്ങളിൽ യോഗ പഠിപ്പിച്ച് ലഡാക്കിലെത്താനാണ് തീരുമാനം. ഒരു പ്രതീക്ഷയും ഇല്ലാതെയാണ് യാത്ര തുടങ്ങിയത്. പക്ഷെ പിന്നീട് പോസിറ്റീവ് ആയ അനുഭവം ആയിരുന്നു. ഒരു പെൺകുട്ടി തനിച്ച് യാത്ര ചെയ്യുന്നുവെന്ന് അറിയുമ്പോൾ എല്ലാവരും സഹായിക്കാൻ തയ്യാറാകുന്നുണ്ട്.
യോഗ തെറാപ്പിയിൽ ബിരുദാനന്തര ബിരുദവും ന്യൂറോ സയൻസിൽ പിഎച്ച്്ഡിയും അഗ്രിമ പൂർത്തിയാക്കിയിട്ടുണ്ട്. യാത്രയ്ക്കിടെ കോഴിക്കോട് അഗ്രിമയുടെ നേതൃത്വത്തിൽ ന്യൂറോ സയൻസും യോഗയും എന്ന വിഷയത്തിൽ ക്ലാസും നടന്നു. കോഴിക്കോട് പൗരാവലി ആദരവും നൽകി.
