പാലക്കാട്: വ്യാജ മാർക്ക് ലിസ്റ്റ് സമർപ്പിച്ച് പാലക്കാട് പുതുക്കോട് പഞ്ചായത്തിൽ താത്കാലിക ജോലി നേടിയ മുൻ ഡിവൈഎഫ്ഐ നേതാവിനെതിരെ വഞ്ചനാക്കുറ്റത്തിന് കേസ്. തൊഴിലുറപ്പ് അക്കൗണ്ടന്റ് കം ഐ.ടി. അസിസ്റ്റന്റായി ജോലി ചെയ്തിരുന്ന കെ.വി. ഗണപതിക്കെതിരെയാണ് വടക്കഞ്ചേരി പോലീസ് കേസെടുത്തത്.
അഞ്ച് വർഷത്തോളം പുതുക്കോട് പഞ്ചായത്തിൽ ജോലി ചെയ്തിരുന്ന ഗണപതി ബികോം ബിരുദം പാസാകാതെയാണ് കാലിക്കറ്റ് സർവകലാശാലയിൽ നിന്നുള്ളതെന്ന പേരിൽ വ്യാജ മാർക്ക് ലിസ്റ്റ് സമർപ്പിച്ച് ജോലി നേടിയതെന്നാണ് ആരോപണം. തട്ടിപ്പ് കണ്ടെത്തിയതിനെ തുടർന്ന് പഞ്ചായത്ത് സെക്രട്ടറി പോലീസിൽ പരാതി നൽകുകയായിരുന്നു.
പോലീസ് കേസ് രജിസ്റ്റർ ചെയ്തതിന് പിന്നാലെ കെ.വി. ഗണപതി ഒളിവിൽ പോയതായി റിപ്പോർട്ടുണ്ട്. പരാതി ഉയർന്നതിനെ തുടർന്ന് ഗണപതിയെ സിപിഐഎമ്മിൽ നിന്ന് പുറത്താക്കിയതായി പാർട്ടി നേതൃത്വം നേരത്തെ അറിയിച്ചിരുന്നു.
കരാർ കാലാവധി പൂർത്തിയായതിനെ തുടർന്ന് പുതിയ പഞ്ചായത്ത് ഭരണസമിതി ഗണപതിയെ ജോലിയിൽ നിന്ന് നീക്കിയിരുന്നു. ഇതിനെതിരെ ഗണപതി ഹൈക്കോടതിയെ സമീപിക്കുകയും ജോലിയിൽ നിന്ന് നീക്കിയ നടപടിക്കെതിരെ സ്റ്റേ നേടുകയും ചെയ്തു.
എന്നാൽ, പിന്നീട് പഞ്ചായത്ത് അധികൃതർ ഹാജരാക്കിയ ബിരുദ മാർക്ക് ലിസ്റ്റ് പരിശോധിച്ചതോടെയാണ് അത് വ്യാജമാണെന്ന് കണ്ടെത്തിയത്. ബികോം ബിരുദം നേടിയിട്ടില്ലെന്നിരിക്കെ വ്യാജ രേഖ ഉപയോഗിച്ച് ജോലി നേടിയെന്ന ആരോപണത്തിലാണ് ഇപ്പോൾ പോലീസ് വഞ്ചനാക്കുറ്റത്തിന് കേസെടുത്തിരിക്കുന്നത്.
വ്യാജ വിദ്യാഭ്യാസ രേഖ ഉപയോഗിച്ച് സർക്കാർ സ്ഥാപനത്തിന് കീഴിൽ വർഷങ്ങളോളം ജോലി ചെയ്തെന്ന ആരോപണം പുറത്തുവന്നതോടെ സംഭവത്തിൽ കൂടുതൽ അന്വേഷണം നടക്കുകയാണ്. ഗണപതിയെ കണ്ടെത്താനുള്ള നടപടികളും പോലീസ് ശക്തമാക്കിയിട്ടുണ്ട്.
