കൊച്ചി: പിടികിട്ടാപ്പുള്ളി സുകുമാരക്കുറുപ്പിനെ ബ്രൂണെയിൽ കണ്ടെത്തിയെന്ന തരത്തിൽ പ്രചരിച്ച വാർത്തകൾക്ക് പിന്നിൽ വൻ ഗൂഢാലോചനയുണ്ടോയെന്ന് അന്വേഷിക്കാൻ ക്രൈംബ്രാഞ്ച്. സുകുമാരക്കുറുപ്പ് കേസിന്റെ അന്വേഷണ ചുമതല നിലവിലെ ക്രൈംബ്രാഞ്ച് സംഘത്തിന് കൈമാറി. കേസിന്റെ മുൻ അന്വേഷണ ഉദ്യോഗസ്ഥൻ അലി അക്ബർ ഉൾപ്പെടെയുള്ളവരെ ക്രൈംബ്രാഞ്ച് ചോദ്യം ചെയ്യുമെന്നാണ് വിവരം.
ബ്രൂണെയിൽ സുകുമാരക്കുറുപ്പിനെ കണ്ടെത്തിയെന്ന വ്യാജ പ്രചാരണത്തിന്റെ ഉറവിടം കണ്ടെത്തുന്നതിനാണ് പ്രധാനമായും അന്വേഷണം. ഇതുമായി ബന്ധപ്പെട്ട തുടരന്വേഷണം ഒരുമാസത്തിനുള്ളിൽ പൂർത്തിയാക്കാനാണ് ക്രൈംബ്രാഞ്ചിന്റെ തീരുമാനം.
അതേസമയം, സുകുമാരക്കുറുപ്പ് ബ്രൂണെയിൽ ഉണ്ടെന്ന തരത്തിൽ പ്രചരിച്ച വാർത്തയിൽ അന്താരാഷ്‌ട്ര അന്വേഷണ ഏജൻസിയായ ഇന്റർപോളിന് കത്തയക്കേണ്ടതില്ലെന്നാണ് ക്രൈംബ്രാഞ്ച് ഉന്നതവൃത്തങ്ങളുടെ തീരുമാനം. പ്രചരിച്ച വിവരങ്ങളിലെ ദുരൂഹത നീങ്ങിയ സാഹചര്യത്തിലാണ് ഇത്തരമൊരു നിലപാട് സ്വീകരിച്ചത്.
സുകുമാരക്കുറുപ്പിന്റേതെന്ന പേരിൽ പ്രചരിച്ച ചിത്രം തൃശൂർ സ്വദേശിയുടേതാണെന്ന് രഹസ്യാന്വേഷണ വിഭാഗം സ്ഥിരീകരിച്ചിട്ടുണ്ട്. ഇതോടെ ബ്രൂണെയിൽ കണ്ടെത്തിയ വ്യക്തി സുകുമാരക്കുറുപ്പല്ലെന്ന് വ്യക്തമായി.
സൈബർ ഹാക്കറുടെ സഹായത്തോടെ ഇത്തരമൊരു പ്രചാരണം ഉണ്ടായേക്കാമെന്ന് സ്പെഷ്യൽ ബ്രാഞ്ച് നേരത്തെ മുന്നറിയിപ്പ് നൽകിയിരുന്നതായും വിവരമുണ്ട്. അതിനാൽ തന്നെ വെളിപ്പെടുത്തലുകൾ പുറത്തുവന്ന ഘട്ടത്തിൽ പൊലീസ് കൂടുതൽ പ്രതികരണങ്ങൾക്ക് മുതിരാതെ ജാഗ്രത പാലിച്ചിരുന്നു.
എന്നാൽ ബ്രൂണെയിലുള്ളത് സുകുമാരക്കുറുപ്പല്ലെന്ന് വ്യക്തമായതോടെ പ്രചാരണത്തിന് പിന്നിൽ ആസൂത്രിതമായ നീക്കമുണ്ടായിരുന്നോ എന്ന സംശയം ശക്തമായി. കേസന്വേഷണത്തെ വഴിതെറ്റിക്കാനുള്ള ബോധപൂർവമായ ശ്രമമായിരുന്നോ ഇതെന്നും ക്രൈംബ്രാഞ്ച് പരിശോധിക്കും.
സുകുമാരക്കുറുപ്പ് കേസിൽ നിലവിലെ അന്വേഷണസംഘം ഒരുമാസത്തിനകം അന്വേഷണം പൂർത്തിയാക്കി റിപ്പോർട്ട് സമർപ്പിക്കാനിരിക്കുകയാണ്. കേസ് അവസാനിപ്പിക്കുന്നതിന് മുൻപ് ബ്രൂണെയിൽ കുറുപ്പിനെ കണ്ടെത്തിയെന്ന വ്യാജപ്രചാരണത്തിന്റെ യാഥാർത്ഥ്യവും അന്വേഷിച്ച് കണ്ടെത്താനാണ് ക്രൈംബ്രാഞ്ചിന്റെ തീരുമാനം.
മുൻ അന്വേഷണ ഉദ്യോഗസ്ഥരിൽനിന്നുള്ള വിവരങ്ങളും പ്രചാരണവുമായി ബന്ധപ്പെട്ട ഡിജിറ്റൽ തെളിവുകളും പരിശോധിച്ച ശേഷമായിരിക്കും തുടർനടപടികൾ. വ്യാജവാർത്തയ്‌ക്ക് പിന്നിൽ ആരെങ്കിലും ബോധപൂർവം പ്രവർത്തിച്ചിട്ടുണ്ടെങ്കിൽ അവരെ കണ്ടെത്താനുള്ള നീക്കവും അന്വേഷണത്തിന്റെ ഭാഗമാകും.
