കണ്ണൂർ: യുവതിയുടെ കുളിമുറി ദൃശ്യങ്ങൾ പകർത്താൻ ശ്രമിച്ചെന്ന പരാതിയിൽ എസ്എഫ്ഐ നേതാവിനെതിരെ പൊലീസ് കേസ്. പൈസക്കരി ദേവമാതാ കോളേജിലെ എസ്എഫ്ഐ നേതാവും സർവകലാശാല യൂണിയൻ കൗൺസിലറുമായ കെ. നവനീതിനെതിരെയാണ് കണ്ണൂർ സ്വദേശിനിയായ യുവതി പരാതി നൽകിയത്.
വീട്ടിലെ കുളിമുറിയിൽ കുളിക്കുന്നതിനിടെ നവനീത് ഒളിഞ്ഞിരുന്ന് മൊബൈൽ ഫോൺ ഉപയോഗിച്ച് ദൃശ്യങ്ങൾ പകർത്താൻ ശ്രമിച്ചെന്നാണ് യുവതിയുടെ ആരോപണം. പരാതിയുടെ അടിസ്ഥാനത്തിൽ പൊലീസ് കേസെടുത്ത് അന്വേഷണം ആരംഭിച്ചു.
സംഭവവുമായി ബന്ധപ്പെട്ട് യുവാവിനെ കഴിഞ്ഞദിവസം പൊലീസ് കസ്റ്റഡിയിലെടുത്തിരുന്നു. പിന്നീട് അറസ്റ്റ് രേഖപ്പെടുത്തിയ ശേഷം സ്റ്റേഷൻ ജാമ്യത്തിൽ വിട്ടയച്ചു. ഇയാൾ ഉപയോഗിച്ച മൊബൈൽ ഫോൺ പൊലീസ് പിടിച്ചെടുത്ത് ഫോറൻസിക് പരിശോധനയ്ക്കായി അയച്ചിട്ടുണ്ട്. ഫോണിലെ ദൃശ്യങ്ങളും മറ്റ് ഡിജിറ്റൽ വിവരങ്ങളും പരിശോധിച്ച ശേഷമായിരിക്കും അന്വേഷണത്തിന്റെ തുടർനടപടികൾ.
അതേസമയം, പ്രതിക്കെതിരെ നിസാര വകുപ്പുകൾ മാത്രമാണ് ചുമത്തിയതെന്നും പൊലീസ് ഇയാളെ സംരക്ഷിക്കുകയാണെന്നും ആരോപിച്ച് യുവതി ആഭ്യന്തര മന്ത്രിക്ക് പരാതി നൽകിയിട്ടുണ്ട്.
പാർട്ടി നേതൃത്വം ഇടപെട്ട് കേസ് ഒത്തുതീർപ്പാക്കാൻ ശ്രമിച്ചെന്നും യുവതി പരാതിയിൽ ആരോപിക്കുന്നു. പ്രതിക്ക് മാനസികരോഗമുണ്ടെന്ന് വരുത്തിത്തീർത്ത് സംഭവത്തെ ലഘൂകരിക്കാനുള്ള ശ്രമം നടക്കുന്നതായും യുവതി ആരോപിച്ചിട്ടുണ്ട്.
പരാതിയിലെ ആരോപണങ്ങൾ ഉൾപ്പെടെ പരിശോധിച്ച് പൊലീസ് അന്വേഷണം തുടരുകയാണ്. മൊബൈൽ ഫോണിന്റെ ഫോറൻസിക് പരിശോധനാഫലം കേസിൽ നിർണായകമാകുമെന്നാണ് വിവരം.
