ന്യൂഡൽഹി: നാഷണൽ സ്റ്റുഡന്റ്സ് യൂണിയൻ ഓഫ് ഇന്ത്യയുടെ ദേശീയ കോ-ഓർഡിനേറ്റർ അഭിനവ് കുമാർ കോലി കോൺഗ്രസ് വിട്ടു. കോൺഗ്രസിന് ഗാന്ധി കുടുംബത്തോട് അമിതമായ അഭിനിവേശമാണെന്നും ഹിന്ദുക്കളോട് എപ്പോഴും വിദ്വേഷ മനോഭാവമാണെന്നും ചൂണ്ടിക്കാട്ടിയാണ് അഭിനവ് കുമാർ പാർട്ടി വിട്ടത്.
എൻഎസ്യുഐ ദേശീയ അദ്ധ്യക്ഷൻ നീരജ് കുന്ദന് അഭിനവ് കുമാർ രാജിക്കത്ത് അയച്ചു. കഴിഞ്ഞ പത്തുവർഷമായി കോൺഗ്രസിൽ പ്രവർത്തിക്കുകയും നാളുകളായി ദേശീയ കോ-ഓർഡിനേറ്റർ സ്ഥാനം വഹിക്കുകയും ചെയ്യുന്ന അഭിനവ് കുമാർ കോൺഗ്രസിനെതിരെ രൂക്ഷമായ വിമർശനമുന്നയിച്ചായിരുന്നു ചുമതലയിൽ നിന്നൊഴിഞ്ഞത്. കോൺഗ്രസ് പാർട്ടിക്ക് നിലവിൽ ഗാന്ധി കുടുംബത്തോട് മാത്രമാണ് ചായ്വുള്ളതെന്നും പാർട്ടിക്ക് പഴയ പ്രതാപമില്ലെന്നും അഭിനവ് കുമാർ വിമർശിച്ചു.
”ഹിന്ദുക്കൾക്കെതിരെ വിദ്വേഷമുയർത്തുന്ന കോൺഗ്രസ് നിലപാട് ഏറെ നാളുകളായി ആവർത്തിക്കുന്നു. മത്സരിക്കുന്ന 90 ശതമാനം തിരഞ്ഞെടുപ്പുകളിലും തോറ്റുതുന്നംപാടി. ഇടത് സംഘടനകളോടും നേതാക്കളോടും ചായ്വ് പുലർത്തി. അജണ്ടയൊന്നുമില്ലാതെ രാഷ്ട്രീയം കളിച്ചു. ഗാന്ധി കുടുംബത്തിന് അമിത പ്രാധാന്യം നൽകുകയും അവരെ മാത്രം ചുറ്റിപറ്റി പ്രവർത്തിക്കുകയും ചെയ്തു. കോൺഗ്രസിനെ ഇനിയും പഴയ ‘ കോൺഗ്രസ് ‘ ആയി കണക്കാക്കാനാകില്ല. അതുകൊണ്ട് ഇന്ത്യൻ നാഷണൽ കോൺഗ്രസിന്റെ എല്ലാ ചുമതലകളിൽ നിന്നും ഞാൻ ഒഴിയുന്നു.” രാജിക്കത്തിൽ അഭിനവ് കുമാർ വ്യക്തമാക്കി.
ബൂത്ത് തലത്തിൽ നിന്നായിരുന്നു അഭിനവ് കുമാർ കോലി കോൺഗ്രസ് പ്രവർത്തനമാരംഭിച്ചത്. തുടർന്ന് പഞ്ചാബ് എൻഎസ്യുഐയുടെ സംസ്ഥാന വൈസ് പ്രസിഡന്റായി സ്ഥാനമേറ്റു. പത്ത് വർഷത്തെ കോൺഗ്രസ് പ്രവർത്തനത്തിന് ശേഷം മൂന്ന് മാസം മുമ്പായിരുന്നു ദേശീയ കോർഡിനേറ്ററായി സ്ഥാനമേറ്റത്.
