ഓംലെറ്റ് പ്രേമികളാണ് മിക്കയാളുകളും. എന്നാൽ ഏതൊരു ഓംലെറ്റ് പ്രേമിയും കണ്ടാൽ അതിശയിച്ചുപോകുന്ന ഒരു പ്രത്യേകതരം ഓംലെറ്റ് സോഷ്യൽമീഡിയയിൽ ചർച്ചയാകുകയാണ്. ഈ ഓംലെറ്റിന്റെ പാചകക്കൂട്ടാണ് വലിയ വിമർശനങ്ങൾക്ക് വഴിവെച്ചിരിക്കുന്നത്.
കൊക്ക-കോളയും ഓറിയോ ബിസ്കറ്റും ചേർത്തുണ്ടാക്കിയ ഓംലെറ്റാണിത്. വീഡിയോ കണ്ട ഭൂരിഭാഗം ഓംലെറ്റ് പ്രേമികൾക്കും ഓക്കാനം വന്നുവെന്നാണ് സോഷ്യൽമീഡിയയിലെ പ്രതികരണങ്ങൾ സൂചിപ്പിക്കുന്നത്. പാചകം ചെയ്യുന്നതിന്റെ ദൃശ്യങ്ങൾ മുഴുവനായി കണ്ടുതീർക്കാനാകില്ലെന്നും അഭിപ്രായമുയർന്നു.
തെരുവുകച്ചവടക്കാരനായ യുവാവാണ് പുതിയ ഓംലെറ്റ് റെസിപ്പി അവതരിപ്പിച്ചത്. ഇത് പകർത്തിയ ഒരു യൂട്യൂബർ വീഡിയോ പോസ്റ്റ് ചെയ്തതോടെ ‘കോള-ഓറിയോ ഓംലെറ്റ്’ ഇന്റർനെറ്റ് മുഴുവൻ ചർച്ചയാകുകയായിരുന്നു.
മൂന്ന് കോഴിമുട്ടയെടുത്ത് ഒരു ഗ്ലാസിലേക്ക് ഉടച്ചൊഴിക്കുന്നതാണ് വീഡിയോയുടെ തുടക്കം. അരിഞ്ഞുവെച്ച മുളകും സവാളയുമെല്ലാം അതിലേക്ക് ചേർത്തു. പിന്നീട് പാത്രം ചൂടാക്കിയ ശേഷം അതിലേക്ക് കൊക്ക-കോള ഒഴിക്കുകയും തൊട്ടുപിന്നാലെ ഓറിയോ ബിസ്കറ്റ് പൊടിച്ച് വിതറുകയും ചെയ്തു. അതിലേക്ക് ഗ്ലാസിൽ ഒഴിച്ചുവെച്ച മുട്ട പകർത്തി. പാകമായി വന്നപ്പോൾ മുകളിൽ നാല് ബ്രഡ് വെച്ച് മറിച്ചിട്ടു.
കഴിക്കാനായി പാത്രത്തിലേക്ക് മാറ്റിയ ശേഷം അതിന് മുകളിൽ വീണ്ടും അരിഞ്ഞുവെച്ച ഉള്ളിയും മുളകും മല്ലിയിലയും വിതറി. കൂടെ കുറച്ച് ഓറിയോ ബിസ്കറ്റ് പൊടിച്ചതും ചെറുനാരങ്ങ പിഴിഞ്ഞ് നീരും ചേർക്കുന്നുണ്ട്. ഇത്തരത്തിൽ അലങ്കരിച്ച ശേഷമാണ് ഓംലെറ്റ് വിളമ്പുന്നത്.
ഓംലെറ്റ് പ്രോമികളെ ഇത് കാണിച്ച് എന്തിനാണ് ദ്രോഹിക്കുന്നതെന്നാണ് വീഡിയോയ്ക്ക് താഴെ വന്ന പ്രതികരണം. ഇത്തരം വീഡിയോകൾ നിരോധിക്കാൻ കഴിയുമോയെന്നും പലരും ചോദിച്ചു.
വീഡിയോ വൈറലായതോടെ ‘ആരും ഇത് കാണരുതെന്ന’ തലക്കെട്ട് നൽകിയാണ് പലരും ദൃശ്യങ്ങൾ സോഷ്യൽമീഡിയയിൽ പങ്കുവെക്കുന്നത്. നിങ്ങൾക്ക് ഈ വീഡിയോ കണ്ടുതീർക്കാൻ കഴിയുമോയെന്ന് നോക്കൂ..
Comments