ഇന്ത്യയിൽ ലോഞ്ച് ചെയ്യാൻ തയ്യാറായിരിക്കെ റോയൽ എൻഫീൽഡ് ഹണ്ടർ 350യുടെ വിവരങ്ങൾ ചോർന്നു. ടൈപ്പ് അപ്രൂവൽ ഡോക്യുമെന്റുകൾ വഴിയാണ് ബുള്ളറ്റിന്റെ വിവരങ്ങൾ ചോർന്നിരിക്കുന്നത്. അടുത്ത മാസം വാഹനം കമ്പനി അവതരിപ്പിക്കാനിരിക്കുകയായിരുന്നു. പുറത്തുവന്ന വിവരങ്ങൾ അനുസരിച്ച് 20 ബിഎച്ച്പി നൽകുന്ന 349.34 സിസി സിംഗിൾ സിലിണ്ടർ എഞ്ചിൻ ആയിരിക്കും ബുള്ളറ്റിന് നൽകിയിരിക്കുന്നത്. ഇത് ക്ലാസിക് 350, മെറ്റിയർ 350 എന്നിവയിലെ മോട്ടോർ ഉത്പാദിപ്പിക്കുന്ന അതേ അളവ് തന്നെയാണ്.
പുറത്ത് വന്ന രേഖയിൽ ബുള്ളറ്റിന്റെ വലിപ്പവും ഭാരവും വ്യക്തമാക്കുന്ന കണക്കുകളും കാണാം. ഹണ്ടർ 350 ക്ക് ക്ലാസിക് 350, മെറ്റിയോർ 350 എന്നിവയേക്കാൾ നീളവും ഉയരവും കുറവായിരിക്കുമെന്നാണ് വ്യക്തമാകുന്നത്. ക്ലാസിക്കിന് 1,390 മില്ലീമീറ്ററും മെറ്റിയോറിന് 1,400 മില്ലീമീറ്ററുമാണെങ്കിൽ ഹണ്ടർ 350യുടെ വീൽ ബേസ് 1,370 മില്ലീമീറ്ററാണ്.
എഞ്ചിന് പുറമെ ബ്രേക്കിംഗും സസ്പെൻഷൻ മെക്കാനിസവും മെറ്റിയോറിന് തുല്യമായി തന്നെയാണ് ഹണ്ടർ 350ക്ക് നൽകിയിരിക്കുന്നത്. വാഹനത്തിന് മുന്നിലും പിന്നിലും ഡിസ്ക് ബ്രേക്കുകൾക്കൊപ്പം ഡ്യുവൽ-ചാനൽ ABS (ആന്റി-ലോക്ക് ബ്രേക്കിംഗ് സിസ്റ്റം) ഉണ്ടായിരിക്കും. ഇതിന്റെ സസ്പെൻഷൻ സജ്ജീകരണത്തിൽ പരമ്പരാഗത ടെലിസ്കോപ്പിക് ഫോർക്കുകളും മുൻവശത്തെ ഡ്യുവൽ റിയർ ഷോക്ക് അബ്സോർബറുകളും ഉൾപ്പെടുന്നു.
വൃത്താകൃതിയിലുള്ള ഹെഡ്ലാമ്പും Y-ആകൃതിയിലുള്ള അലോയ് വീലുകളും മെറ്റിയോറിന് സമാനമായി കാണുമ്പോൾ തന്നെ ഹണ്ടർ 350 യുടെ സ്വിംഗ് ആം ചെറുതാണ്. മറ്റ് രണ്ട് ബുള്ളറ്റിൽ നിന്നും വ്യത്യസ്തമായി രൂപകൽപ്പന ചെയ്ത ഇന്ധന ടാങ്ക്, സിംഗിൾ പീസ് സീറ്റ് എന്നിവ ഹണ്ടർ 350 യുടെ പ്രത്യേകതയാണ്. ടെയിൽലാമ്പുകൾ, ഗ്രാബ് ഹാൻഡിലുകൾ, മഡ്ഗാർഡുകൾ എന്നിവയും വളരെ വ്യത്യസ്തമാണ്. ചെന്നൈ ആസ്ഥാനമായുള്ള നിർമ്മാതാവിൽ നിന്ന് പുറത്തിറങ്ങാൻ തയ്യാറാകുന്ന ഹണ്ടർ 350യുടെ വിവരങ്ങൾ ഇതിന് മുമ്പ് ചോർന്നിരുന്നു. മുൻവശത്ത് ഒരു ഫ്ലൈ സ്ക്രീനും ഒരു പില്യൺ ബാക്ക്റെസ്റ്റും വ്യക്തമായിരുന്നു. പുറത്ത് വന്ന ചിത്രത്തിൽ ഹാലൊജൻ ഹെഡ്ലൈറ്റ് അസംബ്ലി, എൽഇഡി ടേൺ ഇൻഡിക്കേറ്ററുകൾ, കോംപാക്റ്റ് എക്സ്ഹോസ്റ്റ് കാനിസ്റ്റർ, അലോയ് വീലുകൾ എന്നിവയുടെ രൂപങ്ങൾ വ്യക്തമായിരുന്നു. ജൂലൈ ആദ്യം നടപടിക്രമം പൂർത്തിയായതിനാൽ ഓഗസ്റ്റ് ആദ്യം തന്നെ ലോഞ്ച് നടക്കുമെന്നാണ് പ്രതീക്ഷ.
