എസ്എല്ആർ (സിംഗിൾ ലെൻസ് റിഫ്ലെക്സ്) ക്യാമറകള് നിർമ്മിക്കുന്നത് അവസാനിപ്പിക്കാന് പ്രമുഖ ക്യാമറ നിർമ്മാതാക്കളായ നിക്കോൺ ഒരുങ്ങുന്നതായി റിപ്പോർട്ടുകൾ.ഇതോടെ ക്യാമറ ലോകത്ത് പുതിയ ചർച്ചകൾക്ക് വഴിയൊരുങ്ങുകയാണ്. സ്മാർട്ട്ഫോൺ ക്യാമറകളില് നിന്നുള്ള കടുത്ത മത്സരമാണ് ഇത്തരം ഒരു ചിന്തയിലേക്ക് ജാപ്പനീസ് ക്യാമറ നിർമ്മാതാക്കളെ നയിച്ചത് എന്നാണ് റിപ്പോര്ട്ട്.
നിക്കോണ് ഡിജിറ്റൽ ഫോട്ടോഗ്രാഫി രംഗത്ത് പുതിയ പരീക്ഷണങ്ങളില് ശ്രദ്ധ കേന്ദ്രീകരിക്കുമെന്നാണ് പുതിയ റിപ്പോർട്ടുകൾ പറയുന്നത് . നിക്കോണ് ഡി6 ഡിഎസ്എല്ആര് (Nikon D6 DSLR) ആയിരിക്കും നിക്കോണിന്റെ അവസാന എസ്എൽആർ എന്നാണ് പറയപ്പെടുന്നത്. പ്രമുഖ ജാപ്പനീസ് പ്രസിദ്ധീകരണമായ നിക്കി ഏഷ്യയാണ് ഇത് സംബന്ധിച്ച റിപ്പോർട്ട് പുറത്ത് വിട്ടത് . നിക്കോണിന്റെ എസ്എല്ആറുകളും മിറർലെസ്സ് ക്യാമറകളുമാണ് പ്രൊഫഷണൽ ഫോട്ടോഗ്രാഫർമാർ വ്യാപകമായി ഉപയോഗിക്കുന്നത്.
ഏകദേശം 60 വർഷമായി ക്യാമറ രംഗത്തെ പ്രധാന പേരാണ് നിക്കോണ്. സ്മാർട്ട്ഫോൺ ക്യാമറ സാങ്കേതികവിദ്യയുടെ വളർച്ച കാരണം, ക്യാമറ വിൽപ്പനയിൽ വലിയ ഇടിവാണ് അടുത്തകാലത്ത് സംഭവിച്ചത്. നൂതന ഡിജിറ്റൽ സാങ്കേതികവിദ്യകളുടെ പിൻബലത്തിൽ കൂടുതൽ ആളുകൾ തിരഞ്ഞെടുക്കുന്ന ക്യാമറയായി മാറിയ മിറർലെസ് ക്യാമറകളിൽ ശ്രദ്ധ കേന്ദ്രീകരിക്കാനാണ് കമ്പനി ശ്രമിക്കുന്നത് എന്നാണ് റിപ്പോര്ട്ട്.
2020 ജൂൺ മുതൽ അതിന്റെ മുൻനിര ക്യാമറയായ ഡി6 ന് ശേഷം ഡിഎസ്എല്ആര് ക്യാമറ ഇറക്കിയിട്ടില്ല. കമ്പനി അതിന്റെ Z-സീരീസിൽ മിറർലെസ് ക്യാമറകൾ അവതരിപ്പിക്കുന്നുണ്ട്. നിക്കോൺ Z 50, ഇസഡ് Z 70, നിക്കോൺ Z 7II പോലുള്ള മുൻനിര മിറർലെസ് ക്യാമറകൾ ഇതിനകം വിപണിയിലുണ്ട്.
ഒപ്പം പുതുതായി എത്തുന്ന നിക്കോൺ Z30 ഉം.കോംപാക്റ്റ് ഡിജിറ്റൽ ക്യാമറകളുടെ നിർമ്മാണവും നിക്കോൺ ഇതിനകം നിർത്തിയിട്ടുണ്ട്. മിറർലെസ് ക്യാമറകളിൽ കൂടുതൽ ശ്രദ്ധ കേന്ദ്രീകരിക്കാൻ കമ്പനി ലക്ഷ്യമിടുന്നുണ്ടെങ്കിലും, നിലവിലുള്ള എസ്എൽആറുകളുടെ നിര്മ്മാണവും വിതരണവും സര്വീസും നിക്കോൺ തുടരുമെന്നും റിപ്പോർട്ടുകളുണ്ട്
