വാഷിംഗ്ടൺ: കൃത്യമായ വഴിയറിയാത്ത സ്ഥലങ്ങളിലേക്ക് യാത്ര പോകുമ്പോൾ ഇന്ന് വലിയ സഹായമാണ് ഗൂഗിൾമാപ്പ്. അയാൾ കഥ എഴുതുകയാണ് സിനിമയിൽ മോഹൻലാൽ കഥാപാത്രമായ സാഗർ കോട്ടപ്പറമ്പ് നമുക്ക് ചോദിച്ച് ചോദിച്ച് പോകാം എന്ന് പറയുന്നത് പോലെ ഗൂഗിളിനോട് ചോദിച്ച് ചോദിച്ച് ആണ് ഇന്ന് മിക്കവരും പരിചയമില്ലാത്ത സ്ഥലങ്ങളിലേക്ക് യാത്ര പോകാറുള്ളത്.
ഇനി വഴി പറഞ്ഞു തരുന്നതിനോടൊപ്പം അധികം ഇന്ധന നഷ്ടമില്ലാതെ യാത്ര ചെയ്യാൻ സഹായിക്കാമെന്നാണ് ഗൂഗിൾ പറയുന്നത്. ഫ്യൂവൽ എഫിഷന്റ് റൂട്ട് എന്ന ഫീച്ചർ വഴിയാണ് ഇത് സാധ്യമാകുന്നത്. ഉപയോക്താക്കളുടെ കാറിന്റെ എഞ്ചിൻ തരം അടിസ്ഥാനമാക്കി പോകേണ്ട സ്ഥലത്തേക്ക് നാവിഗേറ്റ് ചെയ്യുമ്പോൾ ഫ്യൂവൽ എഫിഷന്റ് റൂട്ട് കാണിച്ച് തുടങ്ങുമെന്നാണ് വിവരം.
വാഹന ഉടമകളെ ഏറ്റവും ഇന്ധനക്ഷമതയുള്ളതും പരിസ്ഥിതി സൗഹൃദവുമായ റൂട്ട് തിരഞ്ഞെടുക്കാൻ സഹായിക്കുന്നതാണ് ഫീച്ചർ. ഗൂഗിൾ മാപ്പിന്റെ ഏറ്റവും പുതിയ ബീറ്റ അപ്ഡേറ്റ് പതിപ്പ് 11.39-ന്റെ കോഡിലാണ് പുതിയ ഫീച്ചർ എത്തിയിരിക്കുന്നത്.
നിലവിൽ ഇത് ഉപയോക്താക്കൾക്ക് ലഭ്യമായി തുടങ്ങിയിട്ടില്ല. ഈ ഫീച്ചറിൽ വാഹനത്തിന്റെ തരം അടിസ്ഥാനമാക്കിയുള്ള റൂട്ടുകൾ കാണിക്കില്ലെന്നാണ് റിപ്പോർട്ടുകൾ. പകരം എല്ലാത്തരം വാഹനങ്ങൾക്കും പോയിന്റ് എ മുതൽ ബി വരെയുള്ള ഒരൊറ്റ ഇന്ധനക്ഷമതയുള്ള റൂട്ടാണ് കാണിക്കുന്നത്.
നേരത്തെ ഒരു യാത്ര പുറപ്പെടുമ്പോൾ ഏകദേശം എത്ര ടോൾ തുക ആകെ നൽകേണ്ടി വരുമെന്ന് കണക്കാക്കുന്ന ഒരു ഫീച്ചർ ഗൂഗിൾ മാപ്പ് അവതരിപ്പിച്ചിരുന്നു.
ഇന്ത്യ, ഇന്തോനേഷ്യ, ജപ്പാൻ, യുഎസ് എന്നിവിടങ്ങളിലെ ആൻഡ്രോയിഡ്, ഐഒഎസ് ഉപയോക്താക്കൾക്കായിരുന്നു ഈ ഫീച്ചർ ലഭ്യമായിരുന്നത്.
