വാഷിങ്ടണ്‍: ഇറാനുമായുള്ള സംഘര്‍ഷം രൂക്ഷമായി തുടരുന്നതിനിടെ ലോകത്തെ ഏറ്റവും പ്രധാനപ്പെട്ട സമുദ്ര വ്യാപാര പാതകളിലൊന്നായ ഹോര്‍മുസ് കടലിടുക്ക് അമേരിക്കയുടെ നിയന്ത്രണത്തിലാകണമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്. കടലിടുക്കിന്റെ സുരക്ഷ ഉറപ്പാക്കുന്നതിനുള്ള ചെലവിനായി അമേരിക്കയ്‌ക്ക് പ്രതിഫലം നല്‍കണമെന്നും അദ്ദേഹം ആവശ്യപ്പെട്ടു. ഫോക്‌സ് ന്യൂസിന് നല്‍കിയ ടെലിഫോണ്‍ അഭിമുഖത്തിലാണ് ട്രംപ് ഇക്കാര്യം പറഞ്ഞത്. ‘ഹോര്‍മുസ് കടലിടുക്ക് ഞങ്ങള്‍ സംരക്ഷിക്കും. ഒരുപക്ഷേ അതിന്റെ നടത്തിപ്പും ഞങ്ങളായിരിക്കും ഏറ്റെടുക്കുക. ഞങ്ങള്‍ ആ കടലിടുക്കിന്റെ ‘ഗാര്‍ഡിയന്‍’ ആകും. അതിന് പ്രതിഫലം ലഭിക്കേണ്ടതുമുണ്ട്,’ ട്രംപ് പറഞ്ഞു.
ലോകത്തെ എണ്ണ-വാതക കയറ്റുമതിയുടെ ഏകദേശം അഞ്ചിലൊന്ന് ഹോര്‍മുസ് കടലിടുക്കിലൂടെയാണ് കടന്നുപോകുന്നത്. അതിനാല്‍ ആഗോള ഊര്‍ജവിതരണ ശൃംഖലയിലെ ഏറ്റവും നിര്‍ണായക സമുദ്രപാതകളിലൊന്നായാണ് ഇത് കണക്കാക്കപ്പെടുന്നത്.
അതേസമയം, ഹോര്‍മുസ് കടലിടുക്കിന്റെ നിയന്ത്രണവുമായി ബന്ധപ്പെട്ട് അമേരിക്കയും ഇറാനും തമ്മിലുള്ള തര്‍ക്കം കൂടുതല്‍ രൂക്ഷമായിരിക്കുകയാണ്. കടലിടുക്കിന് മേല്‍ തങ്ങള്‍ക്ക് അധികാരമുണ്ടെന്നാണ് ഇറാന്റെ നിലപാട്. എന്നാല്‍, അന്താരാഷ്‌ട്ര സമുദ്രനിയമപ്രകാരം വാണിജ്യക്കപ്പലുകളുടെ സ്വതന്ത്ര സഞ്ചാരം ഉറപ്പാക്കേണ്ടത് അനിവാര്യമാണെന്ന് അമേരിക്ക ആവര്‍ത്തിക്കുന്നു.
പുതിയ വാക്പോരിന്റെ പശ്ചാത്തലത്തില്‍ ഹോര്‍മുസ് കടലിടുക്കിലൂടെ നടക്കുന്ന ചരക്കുനീക്കത്തിന് തടസ്സമുണ്ടാകുമെന്ന ആശങ്ക ശക്തമായതോടെ അന്താരാഷ്‌ട്ര വിപണിയില്‍ എണ്ണവില വീണ്ടും ഉയരുകയും ചെയ്തു.
