മോഹൻലാലിന്റെ സംവിധാനത്തിലൊരുങ്ങുന്ന ആദ്യ ചിത്രമായ ബറോസിന്റെ വിശേഷങ്ങൾക്കായി കാതോർത്തിരിക്കുകയാണ് ആരാധകരെല്ലാവരും. സിനിമ പ്രഖ്യാപിച്ചത് മുതൽ ഇതിനെപ്പറ്റിയുളള വിഷയങ്ങൾക്ക് സോഷ്യൽ മീഡിയയിൽ വൻ സ്വീകാര്യതാണ്. ചിത്രത്തിന്റെ ലൊക്കേഷനും സെറ്റിംഗുമുൾപ്പെടെ തരംഗമായിരുന്നു. ഇപ്പോഴിതാ ബറോസിന്റെ മേക്കിംഗ് വീഡിയോ പുറത്തുവിട്ടിരിക്കുകയാണ്.
രാജ്യാന്തര സിനിമകളോട് കിടപിടച്ച് നിൽക്കുന്ന മേക്കിംഗും രീതിയുമാണ് ബറോസിലേത്. ചിത്രത്തിന്റെ ഷൂട്ടിംഗ് നേരത്തെ ആരംഭിച്ചിരുന്നെങ്കിലും കൊറോണ മൂലം മാറ്റിവെയ്ക്കുകയായിരുന്നു. നിയന്ത്രണങ്ങളിൽ ഇളവ് നൽകിയ ശേഷമാണ് ചിത്രീകരണം വീണ്ടും ആരംഭിച്ചത്.
ഒരു ഇന്റർനാഷണൽ പ്ലാറ്റഫോമിലാണ് സിനിമ അവതരിപ്പിക്കാൻ പോകുന്നത് എന്നും അൺയൂഷ്വൽ ആയിട്ടുള്ള സിനിമയായിരിക്കും ‘ബറോസ്’ എന്നും സംവിധായകനായ മോഹൻലാൽ തന്നെ നേരത്തെ പറഞ്ഞിട്ടുണ്ട്. പോർച്ചുഗീസ് പശ്ചാത്തലത്തിലുള്ള പിരീഡ് സിനിമയാണ് ബറോസ്. വാസ്കോ ഡ ഗാമയുടെ നിധി സൂക്ഷിപ്പുകാരനായ ബറോസ് എന്ന ഭൂതമായാണ് മോഹൻലാൽ ചിത്രത്തിലെത്തുന്നത്. നിധി തേടി ഒരു കുട്ടി ബറോസിന് മുന്നിലെത്തുന്നതാണ് സിനിമയുടെ പ്രമേയം. 400 വർഷങ്ങളായി നിധിക്ക് കാവലിരുന്ന ബറോസ് യഥാർത്ഥ അവകാശിയെ കാത്തിരിക്കുകയാണ്.
കൊച്ചിയും ഗോവയുമാണ് പ്രധാന ലൊക്കേഷനുകൾ. 2019ൽ പ്രഖ്യാപിച്ച ബറോസ് മോഹൻലാലിന്റെ സ്വപ്ന പ്രൊജക്ടാണ്. ഇന്ത്യയിലെ ആദ്യത്തെ ത്രിമാന ചിത്രമായ മൈഡിയർ കുട്ടിച്ചാത്തൻ സംവിധാനം ചെയ്ത ജിജോ പുന്നൂസാണ് ബറോസിന്റെ തിരക്കഥയൊരുക്കിയിരിക്കുന്നത്. മോഹൻലാൽ തന്നെയാണ് ചിത്രത്തിൽ പ്രധാന വേഷത്തിലെത്തുന്നത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമ്മിക്കുന്നത്.
