ഉപഭോക്താക്കൾ പാസ്വേഡ് പങ്കിടുന്നത് തടയാൻ എല്ലാ വഴികളും തേടുകയാണ് ഒടിടി പ്ലാറ്റ്ഫോമായ നെറ്റ്ഫ്ളിക്സ്. ഇതിനായി പുതിയൊരു മാർഗം കണ്ടെത്തി കമ്പനി പരീക്ഷണം ആരംഭിച്ചിട്ടുണ്ട്. ചിലി, കോസ്റ്ററിക്ക, പെറു എന്നിവിടങ്ങളിലാണ് നിലവിൽ പരീക്ഷണം നടത്തുന്നത്.
Add extra member എന്ന ഓപ്ഷനാണ് പുതിയതായി ചേർത്തിരിക്കുന്നത്. നിങ്ങൾ പാസ്വേഡ് ഷെയർ ചെയ്ത അടുത്ത വ്യക്തിക്ക് പുതിയ ഓപ്ഷൻ ഉപയോഗിച്ച് മാത്രമേ നെറ്റ്ഫ്ളിക്സ് കാണാൻ സാധിക്കൂ. എന്നാൽ ഈ ഓപ്ഷൻ ഉപയോഗിക്കണമെങ്കിൽ പണമടക്കണമെന്ന് ആവശ്യപ്പെടും. ഇത്തരത്തിൽ സൗജന്യ പാസ്വേഡ് ഷെയറിംഗ് നിർത്തലാക്കാമെന്നാണ് കമ്പനി കരുതുന്നത്. ഇന്ത്യയിൽ ഇതുവരെ നെറ്റ്ഫ്ളിക്സ് പുതിയ ഓപ്ഷൻ കൊണ്ടുവന്നിട്ടില്ല. ഇത് എല്ലാ രാജ്യങ്ങളിലും പ്രാവർത്തികമാക്കിയാൽ പാസ്വേഡ് പങ്കുവെച്ച് സൗജന്യമായി കാണാനുള്ള അവസരം പൂർണമായും നഷ്ടപ്പെടും.
സമാനരീതിയിൽ Add a home എന്ന ഓപ്ഷൻ കൊണ്ടുവരാനും നെറ്റ്ഫ്ളിക്സ് ആലോചിക്കുന്നുണ്ട്. ഇതിന് നെറ്റ്ഫ്ളിക്സ് പണം ഈടാക്കും. ഇന്ത്യയിൽ പ്രാവർത്തികമാക്കുമ്പോൾ add a home ഓപ്ഷൻ ഉപയോഗിക്കുന്നതിന് ഈടാക്കുന്ന തുകയെത്രയാണെന്ന് പ്രഖ്യാപിച്ചിട്ടില്ല. ഈ വർഷം അവസാനത്തോടെ അക്കൗണ്ട് ഉപയോഗിക്കുന്ന എല്ലാവരിൽ നിന്നും പണമീടാക്കുന്ന രീതിയിൽ മാറ്റങ്ങൾ കൊണ്ടുവരാനാണ് നെറ്റ്ഫ്ളിക്സ് തീരുമാനിച്ചിരിക്കുന്നത്.
കുറഞ്ഞവിലയിലുള്ള സബ്സ്ക്രിപ്ഷൻ പ്ലാൻ പരീക്ഷിക്കുമെന്നും അടുത്തിടെ കമ്പനി പ്രഖ്യാപിച്ചിരുന്നു. പരസ്യങ്ങൾ ചേർത്താണ് ഇത് നടപ്പിലാക്കുക. നിലവിൽ നെറ്റ്ഫ്ളിക്സിൽ പരസ്യങ്ങളില്ല. എന്നാൽ കമ്പനിയുടെ ഓഹരിവിലയിൽ കനത്ത ഇടിവ് സംഭവിച്ചതോടെ പരസ്യങ്ങൾ ഉൾക്കൊള്ളിച്ച് പുതിയ ഓഹരികൾ തിരിച്ചുപിടിക്കാൻ കമ്പനി ശ്രമിക്കുകയാണ്. 2022 ആരംഭത്തിൽ വലിയ നഷ്ടമായിരുന്നു നെറ്റ്ഫ്ളിക്സ് നേരിട്ടത്. രണ്ട് ലക്ഷം വരിക്കാരെ നെറ്റ്ഫ്ളിക്സിന് നഷ്ടപ്പെട്ടതായി റിപ്പോർട്ടുകൾ പുറത്തുവന്നിരുന്നു. പാസ്വേഡ് സൗജന്യമായി പങ്കുവെക്കുന്നതാണ് ഇതിന് കാരണമെന്നായിരുന്നു നെറ്റ്ഫ്ളിക്സിന്റെ വിലയിരുത്തൽ.
