ന്യൂഡൽഹി: അനുഭവ സമ്പത്തിന്റെയും യുവ ആവേശത്തിന്റെയും അതുല്യ മിശ്രണമാണ് കോമൺവെൽത്ത് ഗെയിംസിനുള്ള ഇന്ത്യൻ സംഘമെന്ന് പ്രധാനമന്ത്രി നരേന്ദ്ര മോദി. എല്ലാ കായിക താരങ്ങളും പുതിയ ഇന്ത്യയുടെ ബ്രാൻഡ് അംബാസഡർമാരാണെന്നും പ്രധാനമന്ത്രി പറഞ്ഞു. വീഡിയോ കോൺഫറൻസിംഗിലൂടെയാണ് പ്രധാനമന്ത്രി കായിക താരങ്ങളുമായി സംവദിച്ചത്.
കായിക താരങ്ങളുടെ അനുഭവങ്ങൾ ശ്രദ്ധാപൂർവ്വം കേട്ട പ്രധാനമന്ത്രി, അവർക്ക് വിജയാശംസകൾ നേർന്നു. അന്താരാഷ്ട്ര വേദിയിൽ ആദ്യമായി ഇന്ത്യയെ പ്രതിനിധീകരിക്കുന്ന കായിക താരങ്ങൾക്ക് പ്രധാനമന്ത്രി പ്രത്യേക ഉപദേശവും നൽകി. വേദി മാത്രമാണ് മാറിയത്, നിങ്ങളുടെ സമീപനത്തിനും നിശ്ചയദാർഢ്യത്തിനും ഒരു മാറ്റവുമില്ല. നമ്മുടെ ലക്ഷ്യം ദേശീയഗാനം കേൾക്കുമ്പോൾ ത്രിവർണ്ണ പതാക പാറിക്കളിക്കുന്നത് കാണുക എന്നതായിരിക്കണമെന്നും പ്രധാനമന്ത്രി പറഞ്ഞു. താരങ്ങൾ സമ്മർദ്ദത്തിന് അടിപ്പെടരുത്. ശക്തവും മികവുറ്റതുമായ പോരാട്ടം കാഴ്ചവെക്കണമെന്നും അദ്ദേഹം പറഞ്ഞു.
മലയാളികൾ ഉൾപ്പെടെയുള്ള കായിക താരങ്ങളോട് അനുഭവങ്ങൾ പങ്കുവെക്കാൻ പറഞ്ഞ പ്രധാനമന്ത്രി, അവർക്ക് ഓരോരുത്തർക്കും ക്രിയാത്മകമായ നിർദ്ദേശങ്ങളും നൽകി. ഖേലോ ഇന്ത്യയിലൂടെ ദേശീയ തലത്തിലേക്ക് എത്തപ്പെട്ട കായിക താരങ്ങൾ, അത്തരമൊരു വേദി ഒരുക്കിയതിന് പ്രധാനമന്ത്രിക്ക് നന്ദി പറഞ്ഞു.
ജൂലൈ 28 മുതൽ ഓഗസ്റ്റ് 8 വരെ ബിർമിംഗ്ഹാമിലാണ് കോമൺവെൽത്ത് ഗെയിംസ്.
