സ്ത്രീകൾക്കാണ് പുരുഷന്മാരെ അപേക്ഷിച്ച് ആയുർദൈർഘ്യം(life expectancy ) കൂടുതലെന്നാണ് പല പഠനങ്ങളും തെളിയിക്കുന്നത്. രോഗങ്ങളുടെ കാര്യത്തിലും സ്ത്രീകൾ തന്നെയാണ് ഒന്നാമത്. ജീവിതനിലവാരത്തെ ബാധിക്കുന്ന തരത്തിൽ തങ്ങളെ ദുർബലരാക്കുന്ന രോഗങ്ങളാണ് സ്ത്രീകൾക്ക് കൂടുതലും വരാറുള്ളതെന്നാണ് ജോർജിയ സർവകലാശാലയിലെ ഗവേഷകർ നടത്തിയ പഠനം വ്യക്തമാക്കുന്നത്.
കാഴ്ചയെ ബാധിക്കുന്ന മാക്കുലർ ഡീജനറേഷൻ എന്ന രോഗവും ഡിമൻഷ്യ എന്ന മറവി രോഗവും വരുന്നവരിൽ മൂന്നിൽ രണ്ടും സ്ത്രീകളെയാണ് ബാധിക്കുന്നതെന്ന് ഗവേഷണത്തിനു നേതൃത്വം നൽകിയ ബില്ലി ആർ. ഹാമണ്ട് (Billy R. Hammond,)പറയുന്നു. ഭക്ഷണക്രമം മെച്ചപ്പെടുത്തിയും കൂടുതൽ കടുത്ത നിറങ്ങളിലുള്ള പഴങ്ങളും പച്ചക്കറികളും കഴിച്ചും ഈ രോഗങ്ങളുടെ സാധ്യത കുറയ്ക്കാൻ സ്ത്രീകൾക്കാകുമെന്നും ഗവേഷണ റിപ്പോർട്ട് ചൂണ്ടിക്കാട്ടുന്നുണ്ട്.
പിഗ്മെൻറഡ് കരോട്ടിനോയ്ഡുകൾ (pigmented carotenoids) അടങ്ങിയ ചേന, കെയ്ൽ, ചീര, തണ്ണിമത്തൻ, കാപ്സിക്കം, തക്കാളി, ഓറഞ്ച്, കാരറ്റ് എന്നിവ സ്ത്രീകൾ ധാരാളമായി ഭക്ഷണത്തിൽ ഉൾപ്പെടുത്തണമെന്നാണ് ഗവേഷണ റിപ്പോർട്ട് നിർദ്ദേശിക്കുന്നത്. കാഴ്ചശക്തിയിലുണ്ടാകുന്ന കുറവ്, ഓർമ്മക്കുറവ് എന്നിവയെ നിയന്ത്രിക്കാൻ ഈ കടുംവർണ പഴങ്ങളും പച്ചക്കറികളും സഹായിക്കുമെന്നും പഠനം വ്യക്തമാക്കുന്നു.
പഠനം തെളിയിക്കുന്നത് ഓട്ടോ ഇമ്യൂൺ രോഗങ്ങളുടെ 80 ശതമാനവും സ്ത്രീകളെയാണ് ബാധിക്കാറുള്ളതെന്നാണ്. സ്ത്രീകളുടെ ശരീരത്തിൽ വൈറ്റമിനുകളും ധാതുക്കളും ശേഖരിക്കപ്പെടുന്ന രീതിയാണ് ഇതിന്റെ കാരണമെന്ന് പഠനം ചൂണ്ടിക്കാണിക്കുന്നത്.
പുരുഷന്മാരെ അപേക്ഷിച്ച് സ്ത്രീകൾക്ക് ശരീരത്തിലെ കൊഴുപ്പ് കൂടുതലുണ്ടാകും. ഇത് ഡയറ്ററി വൈറ്റമിനുകളും ധാതുക്കളും ശേഖരിച്ച് വയ്ക്കാനും ഗർഭകാലത്തും മറ്റും ഉപയോഗപ്പെടുത്താനും സ്ത്രീകളെ സഹായിക്കും. അതേ സമയം ഈ പോഷണങ്ങൾ കണ്ണുകളിലും തലച്ചോറിലും ലഭിക്കാത്ത അവസ്ഥയും ഇത് മൂലം ഉണ്ടാകും. ഇതാണ് നാഡീവ്യൂഹ സംബന്ധമായ പ്രശ്നങ്ങൾ സ്ത്രീകൾക്ക് കൂടുതലായി ഉണ്ടാകാൻ കാരണമായി ഗവേഷകർ പറയുന്നത്.
ഇവിടെയാണ് ആൻറിഓക്സിഡൻറുകൾ ധാരാളമുള്ള, നിറമുള്ള പച്ചക്കറികളുടെയും പഴങ്ങളുടെയും പ്രാധാന്യം. ല്യൂടെയ്ൻ, സിയാസാന്തിൻ പോലുളള കരോട്ടിനോയ്ഡുകൾ കേന്ദ്ര നാഡീവ്യൂഹ വ്യവസ്ഥയുടെ നാശത്തെ ലഘൂകരിക്കുന്നു. സപ്ലിമെൻറുകളായി കരോട്ടിനോയ്ഡുകൾ എടുക്കാമെങ്കിലും ഭക്ഷണത്തിലൂടെ അവ ലഭിക്കുന്നതാണ് നല്ലതെന്നും പഠനറിപ്പോർട്ട് വ്യക്തമാക്കുന്നു.
Comments