മലയാളികളുടെ പ്രിയപ്പെട്ട ഗാനമാണ് മമ്മൂട്ടി നായകനായ കാതോട് കാതോരം എന്ന ചിത്രത്തിലെ ‘ദേവദൂതര് പാടി’ എന്നത്. ഔസേപ്പച്ചൻ സംഗീതം നൽകി യേശുദാസ് പാടിയ മലയാളികളുടെ പ്രിയപ്പെട്ട ഗാനം വീണ്ടും റിപ്രൊഡ്യൂസ് ചെയ്തിരിക്കുകയാണ് ‘ന്നാ താന് കേസ് കൊട്’ എന്ന ചിത്രത്തിലൂടെ. ചിത്രത്തിലെ വീഡിയോ ഗാനം അണിയറ പ്രവർത്തകർ പുറത്ത് വിട്ടിരിക്കുകയാണ്. ഗാനത്തിന്റെ പ്രധാന ആകർഷണമെന്നത് കുഞ്ചാക്കോ ബോബന്റെ രസകരമായ നൃത്തമാണ്.
നടൻ മമ്മൂട്ടിയാണ് വീഡിയോ ഗാനം തന്റെ ഫേയ്സ്ബുക്കിലൂടെ പ്രേക്ഷകർക്ക് സമ്മാനിച്ചത്. കാതോട് കാതോരം എന്ന സിനിമയിലെ ലക്ഷകണക്കിന് ആൾക്കാരുടെ വികാരമായി മാറിയ ‘ദേവദൂതര് പാടി’ എന്ന ഗാനം 37 വര്ഷങ്ങള്ക്ക് ശേഷം ‘ന്നാ താന് കേസ് കൊട്’ എന്ന ചിത്രത്തിലൂടെ പുനഃസൃഷ്ടിക്കാന് പോവുകയാണെന്ന് അറിയിക്കുന്നതില് അതിയായ സന്തോഷമുണ്ട്. എന്റെ പ്രിയപ്പെട്ട കുഞ്ചാക്കോ ബോബനും മുഴുവന് ടീമിനും എല്ലാ ആശംസകളും നേരുന്നു എന്നാണ് മമ്മൂട്ടി ഫേയ്സ്ബുക്കിൽ കുറിച്ചത്. ഇപ്പോൾ സമൂഹമാദ്ധ്യമങ്ങളിൽ കുഞ്ചാക്കോ ബോബന്റെ രസകരമായ നൃത്തം വൈറലായിരിക്കുകയാണ്.
ആൻഡ്രോയ്ഡ് കുഞ്ഞപ്പൻ’ എന്ന ജനപ്രിയ ചിത്രത്തിന്റെ സംവിധായകൻ രതീഷ് ബാലകൃഷ്ണൻ പൊതുവാളാണ് ചിത്രത്തിന്റെ രചനയും സംവിധാനവും നിർവഹിക്കുന്നത്. എസ്. ടി. കെ ഫ്രെയിംസിന്റെ ബാനറിൽ പ്രശസ്ത നിർമ്മാതാവ് സന്തോഷ്. ടി. കുരുവിള നിർമ്മാണവും കുഞ്ചാക്കോ ബോബൻ പ്രൊഡക്ഷൻസ്, ഉദയ പിക്ചേഴ്സ് എന്നീ ബാനറുകളുടെ കീഴിൽ കുഞ്ചാക്കോ ബോബൻ സഹനിർമ്മാണവും നിർവ്വഹിക്കുന്ന ‘ന്നാ താൻ കേസ് കൊട്’ ഹാസ്യപശ്ചാത്തലത്തിൽ പുറത്തിറങ്ങുന്ന ചിത്രമാണ്.
