സുരേഷ്‌ഗോപി-ജോഷി കൂട്ടുകെട്ടിന്റെ ‘പാപ്പൻ’ നിലയ്‌ക്കാത്ത കൈയ്യടികളോടെ വിജയ കുതിപ്പ് തുടരുകയാണ്. ജൂലൈ 29-ന് തിയറ്ററിൽ റിലീസ് ചെയ്ത സിനിമ രണ്ടാം ആഴ്ചയിലും വലിയ മുന്നേറ്റമാണ് കാഴ്ച വെയ്‌ക്കുന്നത്. കൊറോണ പ്രതിസന്ധികൾക്ക് ശേഷം കരകയറി വരുന്ന സിനിമാ മേഖലയ്‌ക്ക് ആശ്വാസമായിരിക്കുകയാണ് പാപ്പൻ. മഴക്കെടുതികൾ രൂക്ഷമായിട്ടും പാപ്പനെ കാണുവാൻ തിയറ്ററുകളിൽ തിരക്ക് അനുഭവപ്പെട്ടിരുന്നു. ഇപ്പോൾ കനത്ത മഴ മാറി നിന്നതോടെ വീണ്ടും തിയറ്ററുകളിൽ വൻ ജന തിരക്കാണ്. വലിയ കളക്ഷനാണ് ഇതിനോടകം ചിത്രം സ്വന്തമാക്കിയിരിക്കുന്നത്. പുറത്തു വരുന്ന റിപ്പോർട്ടുകൾ പ്രകാരം പത്തു ദിവസം കൊണ്ട് പാപ്പൻ നേടിയത് 31.43 കോടി രൂപയാണ്.
ആഗോള ബോക്സ് ഓഫീസിൽ നിന്നുമാണ് ചിത്രം 31 കോടി കടന്നത്. പാപ്പൻ ചിത്രത്തിന്റെ ഔദ്യോഗിക ഫേയ്‌സ്ബുക്ക് പേജിലൂടെയാണ് കളക്ഷൻ പുറത്തുവിട്ടിരിക്കുന്നത്. റിലീസ് ചെയ്ത് ആദ്യം ദിവസം തന്നെ 3.16 കോടി ചിത്രം നേടിയിരുന്നു. സിനിമയ്‌ക്ക് മികച്ച അഭിപ്രായം ലഭിച്ചതോടെ രണ്ടാം ദിവസം ചിത്രത്തിന് ആദ്യ ദിവസത്തേക്കാൾ കളക്ഷനാണ്. 3.87 കോടി രൂപയായിരുന്നു രണ്ടാം ദിനം സിനിമയുടെ കളക്ഷൻ. കേരളത്തിൽ നിന്ന് മാത്രം ഒരാഴ്ച കൊണ്ട് പാപ്പൻ നേടിയത് 17.85 കോടിയാണ്. സുരേഷ് ഗോപിയുടെ തന്നെ ഏറ്റവും കൂടുതൽ കളക്ഷൻ സ്വന്തമാക്കുന്ന ചിത്രമാണ് പാപ്പൻ. ഒരു സുരേഷ് ഗോപി ചിത്രം അമ്പത് കോടി ക്ലബിൽ ഇടം നേടുന്ന നിമിഷത്തിനായി കാത്തിരിക്കുകയാണ് മലയാള സിനിമാപ്രേമികളും സുരേഷ് ഗോപി ആരാധകരും.
മാസ്സ് ഫാമിലി ക്രൈം ഇൻവസ്റ്റിഗേഷൻ ത്രില്ലറായി ഒരുക്കിയിരിക്കുന്ന ചിത്രം മലയാളത്തിലിറങ്ങിയ മികച്ച ത്രില്ലറുകളിൽ ഒന്നാണെന്ന് സിനിമാ പ്രേമികൾ പറയുന്നു. എബ്രഹാം മാത്യു മാത്തൻ എന്ന പോലീസ് വേഷമാണ് ചിത്രത്തിൽ സുരേഷ് ഗോപിയുടേത്. മലയാളത്തിൽ ഇറങ്ങിയ ത്രില്ലർ ചിത്രങ്ങൾക്ക് ഇന്നേവരേ ലഭിക്കാത്ത തരത്തിലുള്ള പ്രേക്ഷക സ്വീകാര്യതയും കളക്ഷനുമാണ് പാപ്പന് ലഭിക്കുന്നത്. മലയാളത്തിൽ ഏറ്റവും കൂടുതൽ എക്സ്ട്രോ ഷോസ് ലഭിച്ച ത്രില്ലറുകളിലൊന്നായി മാറി സുരേഷ് ഗോപി-ജോഷി കോംബോയുടെ പാപ്പൻ. സുരേഷ് ഗോപിയ്‌ക്കൊപ്പം മകൻ ഗോകുൽ സുരേഷും മകളായി അഭിനയിക്കുന്ന നീത പിള്ളയും തിയറ്ററുകളിൽ കൈയ്യടി നേടുകയാണ്. ഇവരെ കൂടാതെ കനിഹ, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവൻ, ടിനി ടോം, ഷമ്മി തിലകൻ തുടങ്ങിയ വലിയ താരനിര ചിത്രത്തിൽ അണിനിരക്കുന്നു.
