ഇതിഹാസ ടെന്നീസ് താരം സെറീന വില്യംസ് വിരമിക്കുന്നു. വോഗ് മാഗസീന് നൽകിയ അഭിമുഖത്തിലാണ് താരം വിരമിക്കൽ സൂചന നൽകിയത്. അടുത്ത മാസം നടക്കാനിരിക്കുന്ന യുഎസ് ഓപ്പണിന് ശേഷം സെറീന കളിക്കളം വിടുമെന്നാണ് റിപ്പോർട്ട്.
”റിട്ടയർമെന്റ് എന്ന വാക്ക് ഒരിക്കലും ഞാൻ ഇഷ്ടപ്പെട്ടിട്ടില്ല. അതൊരു പുതിയ വാക്കാണെന്ന് എനിക്ക് ഒരിക്കലും തോന്നിയിട്ടില്ല. റിട്ടയർമെന്റ് എന്നാൽ ഒരു ട്രാൻസിഷൻ കാലമാണ്. ആ വാക്ക് ഉപയോഗിക്കുമ്പോൾ വളരെ ശ്രദ്ധച്ചെലുത്തണമെന്ന് എനിക്കറിയാം. അതുകൊണ്ട് ‘എവലൂഷൻ’ എന്ന വാക്ക് ഉപയോഗിക്കാൻ ആഗ്രഹിക്കുന്നു. ടെന്നീസിൽ നിന്ന് ഞാൻ പരിണമിക്കാൻ പോകുകയാണ്. വളരെയധികം പ്രധാനപ്പെട്ട മറ്റ് കാര്യങ്ങളിലേക്ക് പോകണം. കുറച്ച് വർഷങ്ങൾക്ക് മുമ്പ് ഒരു കമ്പനി ഞാൻ തുടങ്ങിയിരുന്നു. സെറീന വെഞ്ചേഴ്സ്.. അതുകഴിഞ്ഞപ്പോൾ ഞാൻ കുടുംബജീവിതം ആരംഭിച്ചു. ആ കുടുംബത്തെ എനിക്ക് വളർത്തണം. ടെന്നീസിൽ നിന്ന് വിടപറയുക എന്നത് ഏറ്റവും പ്രയാസമേറിയ കാര്യമാണ്. ടെന്നീസ് അവസാനിപ്പിക്കാൻ ഒരിക്കലും ആഗ്രഹിച്ചിട്ടുമില്ല. അതേസമയം ഇനി വരാനിരിക്കുന്ന മറ്റ് കാര്യങ്ങൾക്ക് ഞാൻ തയ്യാറാണെന്നതാണ് സത്യം. ” വോഗിന് നൽകിയ അഭിമുഖത്തിൽ സെറീന പറഞ്ഞു.
23 ഗ്രാൻസ്ലാം കിരീടം നേടിയിട്ടുള്ള താരമാണ് 40-കാരിയായ സെറീന. ഇതുകൂടാതെ 14 ഡബിൾസിലും രണ്ട് മിക്സഡ് ഡബിൾസിലും താരത്തിന് ഗ്രാൻസ്ലാം ലഭിച്ചിട്ടുണ്ട്. കരിയറിൽ 73 സിംഗിൾസുകളിലും 23 ഡബിൾസുകളിലും നേട്ടം സ്വന്തമാക്കിയിട്ടുള്ള സെറീന ഒളിമ്പിക്സിലും മെഡൽ നേടിയിട്ടുണ്ട്.
Comments