ശുചിമുറി വഴി പ്രതി ജയിൽ ചാടി; മൂന്നാം ദിവസം തിരിച്ചെത്തി

കോഴിക്കോട്: വടകരയിൽ ജയിൽ ചാടിയ പ്രതി പോലീസിൽ കീഴടങ്ങി. താമരശ്ശേരി നെരോത്ത് എരവത്ത് കണ്ടി മീത്തൽ വീട്ടിൽ എൻ ഫഹദ് ആണ് വടകര ജയിൽ അധികൃതർക്ക് മുൻപിൽ കീഴടങ്ങിയത്. കഞ്ചാവ് കേസിൽ അഴിയൂർ എക്‌സൈസ് ചെക്ക് പോസ്റ്റിൽ നിന്ന് ആറു കിലോ കഞ്ചാവുമായാണ് ഇയാളെ എക്സ്സൈസ് പിടികൂടിയത്. എന്നാൽ ജയിലിൽ നിന്ന് ചാടിപ്പോവുകയായിരുന്നു.

കഴിഞ്ഞ 10-ാം തീയതി വൈകുന്നേരം നാല് മണിയോടെയായിരുന്നു സംഭവം. ജയിലിലെ ശുചിമുറിയിൽ നിന്നും വെന്റിലേറ്റർ വഴിയാണ് പ്രതി പുറത്ത് കടന്നത്. തുടർന്ന് പഴയ ട്രഷറി കെട്ടിടം വഴി ഇയാൾ കടന്നുകളഞ്ഞു.

ഇതുമായി ബന്ധപ്പെട്ട് കാസർകോടുള്ള ഇയാളുടെ ഭാര്യവീട്ടിലും താമരശ്ശേരിയിലും പോലീസ് റെയിഡ് നടത്തിയിരുന്നു. വടകര പോലീസ് കേസെടുത്ത് അന്വേഷണം നടക്കുന്നതിനിടെ ഇന്ന് രാവിലെ 10.15 ഓടെ ജയിലിൽ കീഴടങ്ങുകയായിരുന്നു പ്രതി.