‘കെജിഎഫ്’ എന്ന ഒറ്റ ചിത്രത്തിലൂടെ ലോക ശ്രദ്ധ നേടിയ സംവിധായകനാണ് പ്രശാന്ത് നീൽ. പ്രഭാസിനെ നായകനാക്കി ഒരുക്കുന്ന ‘സലാർ’ ആണ് അദ്ദേഹത്തിന്റെ അടുത്ത ചിത്രം. സിനിമയുടെ പ്രഖ്യാപനം മുതൽ ആരാധകർ വലിയ കാത്തിരിപ്പിലാണ്. ഇപ്പോൾ ആരാധകരുടെ ആവേശം പതിൻമടങ്ങാക്കി സിനിമയുടെ ഫസ്റ്റ് ലുക്ക് പോസ്റ്റർ പുറത്തുവിട്ടിരിക്കുകയാണ്. സ്വാതന്ത്ര്യദിനത്തോടനുബന്ധിച്ച് സിനിമയുടെ അപ്ഡേറ്റ് ഉണ്ടാകുമെന്ന് അണിയറ പ്രവർത്തകർ അറിയിച്ചിരുന്നു. ഓഗസ്റ്റ് 15 ഇന്ന് ഉച്ചയ്ക്ക് 12.58 നാണ് പോസ്റ്റർ റിലീസ് ചെയ്തിരിക്കുന്നത്. ഇരു കൈകളിലും രക്തം ചീന്തിയ വാളുകളുമായാണ് പോസ്റ്ററിൽ പ്രഭാസിനെ അവതരിപ്പിച്ചിരിക്കുന്നത്. കെജിഎഫിനെ വെല്ലുന്ന ആക്ഷൻ ചിത്രമായിരിക്കും സലാർ എന്ന് ഉറപ്പിക്കുന്ന തരത്തിലുള്ള പോസ്റ്ററാണ് പുറത്തു വന്നിരിക്കുന്നത്.
പ്രഭാസ് ഇരട്ട വേഷത്തിലായിരിക്കും ചിത്രത്തിൽ അഭിനയിക്കുക എന്നാണ് റിപ്പോർട്ട്. രണ്ട് കാലഘട്ടങ്ങളിൽ ആയിട്ടുള്ള കഥയായിരിക്കും ചിത്രം പറയുന്നത്. ‘ബാഹുബലി’ എന്ന ബ്രഹ്മാണ്ഡ ചിത്രത്തിലൂടെ ഇന്ത്യയൊട്ടാകെ ആരാധകരെ സ്വന്തമാക്കിയ താരമാണ് പ്രഭാസ്. ബാഹുബലിയ്ക്ക് ശേഷം പ്രഭാസ് നായകനായി വലിയ ബിഗ്ബജറ്റ് ചിത്രങ്ങൾ വന്നുവെങ്കിലും അവയൊന്നും വിജയമായി തീർന്നില്ല. പ്രശാന്ത് നീൽ ചിത്രത്തിലൂടെ പ്രഭാസ് എത്തുമ്പോൾ മങ്ങിയ തന്റെ താരശോഭ തിരിച്ചുപിടിക്കുമെന്നാണ് ആരാധകർ പ്രതീക്ഷിക്കുന്നത്. പൃത്ഥ്വിരാജും ചിത്രത്തിൽ പ്രധാന വേഷത്തിലെത്തുന്നു.
വിജയ് കിരംഗന്ദുറാണ് ചിത്രത്തിന്റെ നിർമാണം. ‘കെജിഎഫ്’ എന്ന ചിത്രത്തിന്റെ ബാനറായ ഹൊംബാളെ ഫിലിംസ് ആണ് ‘സലാറും’ നിർമിക്കുന്നത്. ശ്രുതി ഹാസൻ ചിത്രത്തിൽ നായികയായി എത്തുന്നു. മധു ഗുരുസ്വാമിയാണ് ചിത്രത്തിൽ പ്രതിനായക വേഷത്തിൽ അഭിനയിക്കുന്നത്. ഹൈദരാബാദ് രാമ നായിഡു സ്റ്റുഡിയോസിലായിരുന്നു’ സലാറി’ന്റെ ആദ്യ ഷെഡ്യുൾ. രവി ബസ്രുറാണ് ചിത്രത്തിന്റെ സംഗീത സംവിധാനം നിർവഹിക്കുന്നത്. ഭുവൻ ഗൗഡയാണ് ചിത്രത്തിന്റെ ഛായാഗ്രാഹകൻ. 2023 സെപ്റ്റംബർ 28 നാണ് സിനിമ തിയറ്ററിൽ എത്തുന്നത്.
Comments