സുരേഷ്ഗോപി-ജോഷി കൂട്ടുകെട്ടിന്റെ ‘പാപ്പൻ’ നിലയ്ക്കാത്ത കൈയ്യടികളോടെ മൂന്നാം വാരത്തിലും വിജയ കുതിപ്പ് തുടരുകയാണ്. ജൂലൈ 29-ന് തിയറ്ററിൽ റിലീസ് ചെയ്ത സിനിമയ്ക്ക് വലിയ സ്വീകരണമാണ് ലഭിച്ചത്. തൊണ്ണൂറുകളിൽ തിയറ്റർ ഇളക്കി മറിച്ച സുരേഷ്ഗോപി-ജോഷി കോംബോ വീണ്ടും തിരിച്ചെത്തിയതാണ് തിയറ്ററുകളിൽ ജനസാഗരം തീർത്തത്. റിലീസ് ചെയ്ത ആദ്യ ദിനം തന്നെ 3.16 കോടി സിനിമ നേടിയിരുന്നു. സുരേഷ് ഗോപിയുടെ ഏറ്റവും വലിയ ഓപ്പണിംങ് കളക്ഷൻ ആയിരുന്നു അത്. ആരാധകരെയും സിനിമാ പ്രേമികളേയും ആവേശം കൊള്ളിക്കുന്ന വാർത്തയാണ് ഇപ്പോൾ പുറത്തു വന്നിരിക്കുന്നത്. വെറും 25 ദിവസം കൊണ്ട് 50 കോടി ക്ലബിൽ കയറിയിരിക്കുകയാണ് പാപ്പൻ.
കൊറോണ പ്രതിസന്ധികൾക്ക് ശേഷം കരകയറി വരുന്ന സിനിമാ മേഖലയ്ക്ക് ആശ്വാസമായിരിക്കുകയാണ് പാപ്പൻ. ആദ്യം ദിനം 3.16, രണ്ടാം ദിവസം 3.87, 7 ദിവസം കൊണ്ട് 17.85, പത്തു ദിവസം കൊണ്ട് 31.43 കോടി എന്നിങ്ങനെ പാപ്പൻ ബോക്സ്ഓഫീസ് വേട്ട നടത്തിയിരുന്നു. ഇപ്പോൾ ചിത്രം 50 കോടി ക്ലബിൽ എത്തിയെന്നുള്ള വാർത്തയും അണിയറ പ്രവർത്തകർ പുറത്തുവിടുന്നു. മാസ്സ് ഫാമിലി ക്രൈം ഇൻവസ്റ്റിഗേഷൻ ത്രില്ലറായി ഒരുക്കിയിരിക്കുന്ന ചിത്രം മലയാളത്തിലിറങ്ങിയ മികച്ച ത്രില്ലറുകളിൽ ഒന്നാണെന്ന് സിനിമാ പ്രേമികൾ പറയുന്നു.
എബ്രഹാം മാത്യു മാത്തൻ എന്ന പോലീസ് വേഷമാണ് ചിത്രത്തിൽ സുരേഷ് ഗോപിയുടേത്. മലയാളത്തിൽ ഇറങ്ങിയ ത്രില്ലർ ചിത്രങ്ങൾക്ക് ഇന്നേവരേ ലഭിക്കാത്ത തരത്തിലുള്ള പ്രേക്ഷക സ്വീകാര്യതയും കളക്ഷനുമാണ് പാപ്പന് ലഭിച്ചത്. മലയാളത്തിൽ ഏറ്റവും കൂടുതൽ എക്സ്ട്രാ ഷോസ് ലഭിച്ച ത്രില്ലറുകളിലൊന്നായി മാറി സുരേഷ് ഗോപി-ജോഷി കോംബോയുടെ പാപ്പൻ. സുരേഷ് ഗോപിയ്ക്കൊപ്പം മകൻ ഗോകുൽ സുരേഷും മകളായി അഭിനയിക്കുന്ന നീത പിള്ളയും തിയറ്ററുകളിൽ കൈയ്യടി നേടി. ഇവരെ കൂടാതെ കനിഹ, നൈല ഉഷ, ആശ ശരത്ത്, ചന്ദുനാഥ്, വിജയരാഘവൻ, ടിനി ടോം, ഷമ്മി തിലകൻ തുടങ്ങിയ വലിയ താരനിര ചിത്രത്തിൽ അണിനിരക്കുന്നു.
