സമൂഹമാദ്ധ്യമങ്ങളിൽ തനിക്കെതിരെ നടക്കുന്ന അധിക്ഷേപങ്ങൾക്ക് മറുപടിയുമായി നടി ദുർഗ കൃഷ്ണ. സെക്ഷ്വൽ ഫ്രസ്ട്രേഷൻ കാരണമാണ് ആളുകൾ ഇത്തരം ഇന്റിമേറ്റ് സീനുകളെ വിമർശിക്കുന്നത് എന്ന് ദുർഗ പറഞ്ഞു. ഒരു മലയാള നടി ഇത്തരം സീനുകൾ ചെയ്യുമ്പോൾ എന്തിനാണ് ആളുകൾ ഇത്രമാത്രം പ്രശ്നമുണ്ടാക്കുന്നത് എന്നും ദുർഗ കൃഷ്ണ ചോദിച്ചു. കുടുക്ക് സിനിമയുമായി ബന്ധപ്പെട്ട വാർത്താ സമ്മേളനത്തിൽ പങ്കെടുത്ത് സംസാരിക്കുകയായിരുന്നു നടി.
എന്റെ തൊഴിലാണ് ഞാൻ ചെയ്യുന്നത് എന്നാണ് ദുർഗ കൃഷ്ണ പറഞ്ഞത്. ഒരു സിനിമയിൽ സാധാരണ ഫൈറ്റ് സീൻ, ഇമോഷണൽ സീൻ, കോമഡി സീൻ എന്നിവ പോലെ മാത്രമേ ഇന്റിമേറ്റ് സീനുകളും കണ്ടിട്ടുള്ളൂ. അതിന് പ്രത്യേകമായൊരു പ്രാധാന്യം ഞാൻ കൊടുക്കുന്നില്ല. അതിങ്ങനെ സ്പെഷ്യൽ ആയി പറയേണ്ട കാര്യമൊന്നും ഇല്ലെന്ന് നടി തുറന്നടിച്ചു.
അത്തരം സീനുകൾ വരുമ്പോൾ മാത്രം എന്തുകൊണ്ടാണ് വിവാദങ്ങൾ ഉണ്ടാകുന്നത്? അതും സ്ത്രീകൾക്ക് നേരെ മാത്രം എന്തിനാണെന്ന് എനിക്ക് മനസിലാകുന്നില്ല. സെക്ഷ്വൽ ഫ്രസ്ട്രേഷൻ കൊണ്ടാകും ആളുകൾ ഇങ്ങനെ ഒക്കെ പറയുന്നത്.
ഹിന്ദി, ഇംഗ്ലീഷ് സിനിമകളിലെ ഇത്തരം രംഗങ്ങൾ ആളുകൾ കണ്ടിരിക്കാറുണ്ട്. ഈ സീനിനെ ആരും വെറുക്കുന്നില്ല. പക്ഷേ ഒരു മലയാള നടി ചെയ്യുമ്പോൾ എന്തുകൊണ്ടാണ് ഇങ്ങനെ പ്രശ്നങ്ങൾ ഉണ്ടാകുന്നുവെന്ന് മനസ്സിലാകുന്നില്ല. എല്ലാവരും അല്ല കുറച്ചു പേർക്ക് മാത്രമാണ് ഈ പ്രശ്നമുളളത് എന്നും നടി പ്രതികരിച്ചു.
അടുത്തിടെയാണ് ധ്യാൻ ശ്രീനിവാസൻ നായകനായ ഉടൽ എന്ന ചിത്രം റിലീസ് ആയത്. ചിത്രത്തിലെ ഇന്റിമേറ്റ് സീനുകൾക്കെതിരെ ഏറെ വിമർശനങ്ങളാണ് ഉയർന്നത്. ദുർഗ കൃഷ്ണയെ ലക്ഷ്യം വെച്ച് സൈബർ ആക്രമണങ്ങളും നടന്നിരുന്നു.
Comments