ന്യൂഡൽഹി: രാജ്യത്തെ 23 എയിംസുകൾക്ക് സ്വാതന്ത്ര്യ സമര സേനാനികളുടേയും പ്രദേശത്തെ സാമൂഹ്യ പരിഷ്കർത്താക്കളുടേയും അവിടുത്തെ ചരിത്ര സ്മാരകങ്ങളുടേയും പേരുകൾ നൽകാനുള്ള നിർദ്ദേശം മുന്നോട്ട് വച്ച് കേന്ദ്ര ആരോഗ്യ മന്ത്രാലയം. നിലവിൽ പ്രവർത്തിച്ചു കൊണ്ടിരിക്കുന്നതും നിർമ്മാണത്തിലിരിക്കുന്നതുമായ എയിംസ് ഇൻസ്റ്റിറ്റ്യൂട്ടുകൾക്ക് പുതിയ പേരുകൾ നൽകുമെന്നാണ് വിവരം. ഇതിനായുള്ള പ്രത്യേക പദ്ധതി കേന്ദ്ര ആരോഗ്യ മന്ത്രാലയം തയ്യാറാക്കിയതായും ദേശീയ മാദ്ധ്യമം പുറത്ത് വിട്ട റിപ്പോർട്ടിൽ പറയുന്നു.
സാമൂഹിക പരിഷ്കർത്താക്കൾ, സ്വാതന്ത്ര്യ സമരസേനാനികൾ, അധികം പ്രശസ്തരല്ലാത്ത ധീരയോദ്ധാക്കൾ, ചരിത്ര സ്മാരകങ്ങൾ തുടങ്ങിയവയുടെ എല്ലാം പേരുകൾ നിർദ്ദേശിക്കപ്പെട്ടതായാണ് വിവരം. പ്രധാൻ മന്ത്രി സ്വാസ്ഥ്യ യോജനയ്ക്ക് കീഴിലാണ് പുതിയ എയിംസുകൾ രാജ്യത്ത് നിർമ്മിക്കുന്നത്. എയിംസ് എന്ന പേരിലാണ് ഇത്തരം ആശുപത്രികൾ പൊതുവായി അറിയപ്പെടാറ്.
എയിംസ് ഭോപ്പാൽ, എയിംസ് ഭുവനേശ്വർ, എയിംസ് ജോധ്പൂർ, എയിംസ് പട്ന, എയിംസ് റായ്പൂർ, എയിംസ് ഋഷികേശ്, എയിംസ് നാഗ്പൂർ, എയിംസ് റായ്ബറേലി, എയിംസ് മധുരൈ തുടങ്ങിയവയുടെ പേരുകൾ മാറ്റിയേക്കും. ഇതിന് പുറമെ പ്രധാൻ മന്ത്രി സ്വാസ്ഥ്യ യോജനയ്ക്ക് കീഴിൽ ബീഹാർ (പാറ്റ്ന), ഛത്തീസ്ഗഡ് (റായ്പൂർ), മധ്യപ്രദേശ് (ഭോപ്പാൽ), ഒഡീഷ (ഭുവനേശ്വര്), രാജസ്ഥാൻ (ജോധ്പൂർ), ഉത്തരാഖണ്ഡ് (ഋഷികേശ്) എന്നിവിടങ്ങളിൽ നിർമ്മാണം പുരോഗമിക്കുന്ന എയിംസുകൾക്കും പുതിയ പേരുകളാകും നൽകുക.
