ഉണ്ണി മുകുന്ദൻ നായകനും നിർമ്മാതാവുമായ വിജയ ചിത്രമായിരുന്നു മേപ്പടിയാൻ. വിഷ്ണു മോഹൻ സംവിധാനം ചെയ്ത ചിത്രം പല ഡീഗ്രേഡുകളെയും വിമർശനങ്ങളെയും കാറ്റിൽപ്പറത്തിയാണ് വിജയം സ്വന്തമാക്കിയത്. ഇപ്പോൾ ചിത്രത്തിന് കൈവന്നിരിക്കുന്ന മറ്റൊരു നേട്ടത്തിന്റെ സന്തോഷം പങ്കുവെച്ചിരിക്കുകയാണ് നടൻ ഉണ്ണി മുകുന്ദൻ. താഷ്ക്കന്റ് അന്താരാഷ്ട്ര ചലച്ചിത്രമേളയിൽ മേപ്പടിയാൻ എന്ന കൊച്ചു ചിത്രം ഇടം നേടിയിരിക്കുകയാണ്. ചിത്രം ഇന്ത്യയുടെ ഔദ്യോഗിക നോമിനേഷൻ ആയ വിവരം താരം സോഷ്യൽ മീഡിയയിലൂടെ വെളിപ്പെടുത്തി.
ഉണ്ണി മുകുന്ദൻ ഫിലിംസ് പ്രൈവറ്റ് ലിമിറ്റഡ് എന്ന ബാനറിലാണ് മേപ്പടിയാൻ എന്ന ചിത്രം നടൻ നിർമ്മിച്ചത്. ഇതിന് മുമ്പ് ബംഗളൂരു രാജ്യാന്തര ചലച്ചിത്ര മേളയിൽ മേപ്പടിയാൻ ഇടം നേടുകയും അംഗീകാരം സ്വന്തമാക്കുകയും ചെയ്തിരുന്നു. ഇന്ത്യൻ സിനിമാ മത്സര വിഭാഗത്തിൽ മികച്ച ചിത്രത്തിനുള്ള പുരസ്കാരവും സിനിമ സ്വന്തമാക്കിയിരുന്നു. ഇതിന് പിന്നാലെയാണ് ചിത്രത്തെ തേടി മറ്റൊരു നേട്ടവും കൂടി കൈവന്നിരിക്കുന്നത്. ദുബായ് എക്സ്പോ ഇന്ത്യ പവലിയനിൽ മേപ്പടിയാൻ പ്രദർശിപ്പിച്ചിരുന്നു. ആദ്യമായാണ് ഒരു ചിത്രം ഇന്ത്യ പവലിയനിൽ പ്രദർശിപ്പിക്കുന്നത്.
ഉണ്ണിയുടെ സ്വന്തം നിർമ്മാണ കമ്പനിയുടെ രണ്ടാമത്തെ ചിത്രമായ ‘ഷെഫീക്കിന്റെ സന്തോഷം’ ഒരുങ്ങുന്നതിനിടയിലാണ് ആദ്യ ചിത്രത്തിന് ഈ നേട്ടം കൈവന്നിരിക്കുന്നത്. അനൂപ് പന്തളം ആദ്യമായി തിരക്കഥയെഴുതി സംവിധാനം ചെയ്യുന്ന സിനിമയാണ് ‘ഷെഫീഖിന്റെ സന്തോഷം’. ആരാധകർ ഏറെ കാത്തിരിക്കുന്ന താരത്തിന്റെ ചിത്രം അടുത്തിടെ പ്രഖ്യാപിച്ച ‘ബ്രൂസ് ലീ’ ആണ്. തിയേറ്ററുകളിൽ വൻ വിജയം നേടിയ മല്ലു സിംഗിന് ശേഷം ഉണ്ണി-വൈശാഖ് കൂട്ടുകെട്ടിലെത്തുന്ന ചിത്രമാണ് ‘ബ്രൂസ് ലീ’ ഉദയ് കൃഷ്ണ തിരക്കഥ ഒരുക്കിയിരിക്കുന്ന ചിത്രം നിർമ്മിക്കുന്നത് ഗോകുലം ഗോപാലനാണ്. പൂർണ്ണമായും ഒരു ആക്ഷൻ എന്റർടൈനറായി ഒരുങ്ങുന്ന ചിത്രത്തിന്റെ മുതൽ മുടക്ക് 50 കോടിയ്ക്ക് മുകളിലാണ്.
Comments