തെലുങ്ക് സിനിമയിലെ സൂപ്പർ സ്റ്റാറാണ് പവൻ കല്ല്യാൺ. ആരാധകർ ‘പവർ സ്റ്റാർ’ എന്നു വിശേഷിപ്പിക്കുന്ന പവൻ കല്ല്യാൺ തന്റെ 54-ാം പിറന്നാൾ ആഘോഷിക്കുകയാണ് ഇന്ന്(സെപ്റ്റംബർ 2). താരത്തിന്റെ ജന്മദിനം ആഘോഷമാക്കാൻ പവൻ കല്ല്യാൺ ആരാധകർക്ക് ഒരു സമ്മാനം നൽകിയിരിക്കുകയാണ് അദ്ദേഹത്തിന്റെ പുതിയ ചിത്രമായ ‘ഹരിഹര വീരമല്ലു’വിന്റെ അണിയറ പ്രവർത്തകർ. ചിത്രത്തിന്റെ ഗ്ലിംപ്സ് വീ‍ഡിയോ പുറത്തുവിട്ടു. ആക്ഷൻ രംഗങ്ങളടങ്ങിയ ഗ്ലിംപ്സ് വീ‍ഡിയോ ആരാധകർ ഇരു കൈയ്യും നീട്ടിയാണ് സ്വീകരിച്ചിരിക്കുന്നത്.
ഒരു ഗുസ്തി മത്സരത്തിൽ എതിരാളികളെ പരാജയപ്പെടുത്തി തന്റെ തുടയിൽ അടിച്ച് വിജയം ആഘോഷിച്ച് രാജകീയമായി നടന്നു പോകുന്ന നായകനെയാണ് ഗ്ലിംപ്സ് വീ‍ഡിയോയിൽ കാണാൻ സാധിക്കുന്നത്. മുഗൾ ഭരണകാലത്തെ ധീരയോദ്ധാവിന്റെ കഥ പറയുന്ന സിനിമ സംവിധാനം ചെയ്തിരിക്കുന്നത് ശ്രീറാം വേണുവാണ്. തുറമുഖ പശ്ചാത്തലത്തിലുള്ള ഈ പിരിഡ് ഡ്രാമ 150 കോടി ബജറ്റിലാണ് ഒരുക്കിയിരിക്കുന്നത്. നിധി അഗർവാളാണ് ചിത്രത്തിലെ നായിക.
പതിനേഴാം നൂറ്റാണ്ടിന്റെ പശ്ചാത്തലത്തിലാണ് ഹരിഹര വീരമല്ലുവിന്റെ കഥ നടക്കുന്നത്. റാംലക്ഷ്മൺ, ശ്യാം കൗഷൽ, ദിലീപ് സുബ്ബരായൻ എന്നിവരാണ് സംഘട്ടനം കൈകാര്യം ചെയ്തിരിക്കുന്നത്. ചിത്രത്തിന്റെ വിഎഫ്എക്‌സ് നിർവ്വഹിക്കുന്നത് ഹോളിവുഡിൽ നിന്നുള്ള ബെൻ ലോക്ക് ആണ്. ഛായാഗ്രഹണം-ജ്ഞാനശേഖർ, സംഗീതം-എംഎം.കീരവാണി. ഈ വർഷം റിലീസ് പ്രഖ്യാപിച്ചിരിക്കുന്ന ബ്രഹ്മാണ്ഡ ചിത്രം നിർമ്മിക്കുന്നത് മെഗാ സൂര്യ പ്രൊഡക്ഷന്റെ ബാനറിൽ എഎം.രത്‍നമാണ്.
