മുംബൈ: പ്രേക്ഷകരുടെയും നിരൂപകരുടെയും പ്രശംസ ഒരു പോലെ പിടിച്ചുപറ്റിയ രണ്ടു സിനിമകളാണ് കെജിഎഫും ദ കശ്മീർ ഫയൽസും. യഷിനെ നായകനാക്കി പ്രശാന്ത് നീൽ സംവിധാനം ചെയ്ത കെജിഎഫും വിവേക് അഗ്നിഹോത്രി സംവിധാനം ചെയ്ത ദ കശ്മീർ ഫയൽസും തീയേറ്ററുകൾ ഇളക്കിമറിച്ചിരുന്നു. ഇപ്പോഴിതാ രണ്ടു ചിത്രങ്ങളെയും വിമർശിച്ച് രംഗത്തെത്തിയിരിക്കുകയാണ് സംവിധായകൻ രാംഗോപാൽ വർമ്മ.
ബോളിവുഡ് ഹംഗാമയ്ക്ക് നൽകിയ അഭിമുഖത്തിലാണ് രാം ഗോപാൽ വർമ സൂപ്പർഹിറ്റ് സിനിമകൾക്കെതിരെ രൂക്ഷവിമർശനം നടത്തിയത്. ബോളിവുഡിലെ ഒരു സംവിധായകനും കെജിഎഫ് ചാപ്റ്റർ 2 ഇഷ്ടമായിട്ടില്ല. അഞ്ചുതവണ ഈ സിനിമ കാണാൻ ശ്രമിച്ചിട്ടും അരമണിക്കൂറിനപ്പുറം സിനിമ കണ്ടിരിക്കാൻ സാധിച്ചില്ല. 70 കളിലെ ഒരു പഴയ സിനിമയെപ്പോലെയാണ് തോന്നിയതെന്ന് അദ്ദേഹം കുറ്റപ്പെടുത്തി.ലോജിക്കും യുക്തിയുമില്ലാത്ത സിനിമയാണ് ഇതെന്നും ഒരു സിനിമ എങ്ങനെ ഇത്രത്തോളം വിജയകരമായി എന്നതിൽ അത്ഭുതം തോന്നുന്നുവെന്നും അദ്ദേഹം കൂട്ടിച്ചേർത്തു.
ദ കശ്മീർ ഫയൽസിനെ അദ്ദേഹം വേഗത കുറഞ്ഞ സിനിമ എന്നാണ് വിശേഷിപ്പിച്ചത്. ജീവനില്ലാത്ത തിരക്കഥയാണ് സിനിമയ്ക്ക്, തിരക്കഥ ഇല്ലെന്ന് വേണെമെങ്കിൽ പറയാം. എന്ന് അദ്ദേഹം കുറ്റപ്പെടുത്തി. കെ.ജി.എഫ് -ചാപ്റ്റർ 2, ദ കശ്മീർ ഫയൽസ് എന്നീ സിനിമകളാണ് എല്ലാം നശിപ്പിച്ചത്. രണ്ടും രണ്ടറ്റത്ത് നിൽക്കുന്ന സിനിമകളാണെന്ന് സംവിധായകൻ കുറ്റപ്പെടുത്തി.
രാംഗോപാൽ വർമ്മയുടെ വിമർശനത്തിനെതിരെ നിരവധി സിനിമാ പ്രേമികളാണ് രംഗത്തെത്തിയിരിക്കുന്നത്. കാമ്പുള്ള സിനിമകൾ തിയേറ്ററുകൾ വിജയിക്കുമ്പോൾ വിറളിപൂണ്ട സംവിധായകന്റെ ജല്പനം മാത്രമായി കരുതിയാൽ മതിയെന്ന് പലരും സംവിധായകനെ വിമർശിച്ചു.
Comments