മിന്നൽ മുരളിയിലൂടെ മലയാളികൾ ഉൾപ്പെടെയുള്ള സിനിമാ ആസ്വാദകർക്ക് സുപരിചിതനായി മാറിയ നടനാണ് ഗുരു സോമസുന്ദരം . ചിത്രത്തിൽ ഷിബു എന്ന പ്രതിനായക വേഷമാണ് താരം ചെയ്തത് എങ്കിലും ആ കഥാപാത്രത്തിലെ വില്ലനെയാണ് ആരാധകർ ഇരുകൈയ്യും നീട്ടി സ്വീകരിച്ചത്. തമിഴ് സിനിമയിലൂടെയാണ് സോമസുന്ദരം അഭിനയ ജീവിതം ആരംഭിച്ചത്. എന്നാൽ മിന്നൽ മുരളിക്ക് പിന്നാലെ മാലയാളത്തിൽ താരം സജീവമാവുകയാണ്. അതിന്റെ ഭാഗമായി മലയാളം വായിക്കാൻ പഠിച്ചതിനെ കുറിച്ചുള്ള അനുഭവം പങ്കുവയ്ക്കുന്ന താരത്തിന്റെ വീഡിയോ സമൂഹമാദ്ധ്യമത്തിൽ വൈറലായിരിക്കുകയാണ്.
യൂട്യൂബ് നോക്കിയാണ് മലയാളം വായിക്കാൻ പഠിച്ചത്. മലയാള സിനിമയിൽ അഭിനയിച്ചതോടെ കാര്യങ്ങൾ കുറച്ചു കൂടെ അനായാസമായി മാറി. ഇപ്പോൾ മലയാള പുസ്തകങ്ങൾ വായിക്കാറുണ്ട്. മലയാളികളുടെ പ്രിയതാരം ലാലേട്ടന്റെ ഗുരുമുഖങ്ങൾ എന്ന പുസ്തകമാണ് ഇപ്പോൾ വായിക്കുന്നതെന്നും വീഡിയോയിലൂടെ അദ്ദേഹം അറിയിച്ചു.
ഗുരു സോമസുന്ദരത്തിന്റേതായി പുറത്ത് വരാനിരിക്കുന്ന ചിത്രം ദീപു അന്തിക്കാട് സംവിധാനം ചെയ്യുന്ന നാലാം മുറയാണ് . ബിജു മേനോനാണ് ചിത്രത്തിലെ നായകൻ. ഈ സിനിമയ്ക്ക് വേണ്ടി സോമസുന്ദരം മലയാളം വായിക്കാൻ പഠിക്കുന്നതും ഡബ്ബ് ചെയ്യുന്നതുമായ വീഡിയോ മുമ്പ് വൈറലായി മാറിയിരുന്നു.
രാജേഷ് കെ രാമൻ സംവിധാനം ചെയ്യുന്ന നീരജ എന്ന ചിത്രമാണ് അദ്ദേഹത്തിന്റെതായി പ്രഖ്യാപിച്ചിരിക്കുന്ന അടുത്ത ചിത്രം. ജിനു ജോസഫ്, ഗോവിന്ദ് പത്മസൂര്യ, ശ്രുതി രാമചന്ദ്രൻ, ശ്രിന്ദ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ഇവർക്ക് പുറമെ ‘ഹൃദയം’ ഫെയിം കലേഷ് രാമാനന്ദ്, രഘുനാഥ് പലേരി, അഭിജ ശിവകല, കോട്ടയം രമേഷ്,സന്തോഷ് കീഴാറ്റൂർ, ശ്രുതി രജനീകാന്ത്, സ്മിനു സിജോ, സജിൻ ചെറുകയിൽ തുടങ്ങിയവരാണ് മറ്റു പ്രമുഖ താരങ്ങൾ.
