ന്യൂഡൽഹി : ബംഗ്ലാദേശ് പ്രധാനമന്ത്രി ഷെയ്ഖ് ഹസീനയുമായി കൂടിക്കാഴ്ച നടത്തി അദാനി ഗ്രൂപ്പ് മേധാവി ഗൗതം അദാനി. ഡൽഹിയിൽ വെച്ചാണ് കൂടിക്കാഴ്ച നടന്നത്. പ്രചോദനപരവും അതിശയകരവുമായ ഷെയ്ഖ് ഹസീനയുടെ ധീരതയെ അദാനി പ്രശംസിച്ചു. ഡിസംബർ മാസത്തോടെ ബംഗ്ലാദേശിലേക്കുള്ള ഗോഡ്ഡ പവർ പ്രോജക്ടിന് കീഴിലുള്ള ട്രാൻസ്മിഷൻ ലൈൻ പൂർത്തിയാക്കാൻ കഴിയുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.
‘ബംഗ്ലാദേശ് പ്രധാനമന്ത്രി ഷെയ്ഖ് ഹസീനയെ നേരിട്ട് കണ്ടത് അഭിമാനകരമാണ്. ബംഗ്ലാദേശിനെക്കുറിച്ചുള്ള അവരുടെ കാഴ്ചപ്പാട് പ്രചോദനാത്മകവും അതിശയകരമവുമാണ്,’ എന്ന് അദാനി ട്വീറ്റ് ചെയ്തു. 1600 മെഗാവാട്ട് ഗോഡ്ഡ പവർ പ്രോജക്ടും ബംഗ്ലാദേശിലേക്കുള്ള ട്രാൻസ്മിഷൻ ലൈനും 2022 ഡിസംബർ 16 ന് കമ്മീഷൻ ചെയ്യാൻ തങ്ങൾ പ്രതിജ്ഞാബദ്ധരാണെന്നും അദ്ദേഹം പറഞ്ഞു.
അദാനി ഗ്രൂപ്പിന്റെ ഇന്ത്യയിലെ ഊർജ്ജ കമ്പനിയായ അദാനി പവർ, ബംഗ്ലാദേശ് പവർ ഡെവലപ്മെന്റ് ബോർഡിന് (ബിപിഡിബി) ഒരു ട്രാൻസ്മിഷൻ ലൈനിലൂടെ വൈദ്യുതി വിതരണം ചെയ്യുന്നതിനായി ജാർഖണ്ഡിലെ ഗോഡ്ഡയിൽ 1,600 മെഗാവാട്ട് തെർമൽ പവർ സ്ഥാപിച്ചിട്ടുണ്ട്.
പ്രധാനമന്ത്രി നരേന്ദ്ര മോദിയുമായി ചർച്ച നടത്തുന്നതിനായി നാല് ദിവസത്തെ സന്ദർശനത്തിനായാണ് ഷെയ്ഖ് ഹസീന രാജ്യത്തെത്തിയത്. പ്രസിഡന്റ് ദ്രൗപദി മുർമു, വൈസ് പ്രസിഡന്റ് ജഗ്ദീപ് ധൻഖർ എന്നിവരെയും ഹസീന സന്ദർശിക്കും.
Comments