തടി കുറയ്ക്കാനുള്ള ഓട്ടത്തിലാണിന്ന് മിക്ക മലയാളികളും. വയറൊന്ന് ചാടിയാൽ, തടി അൽപ്പമൊന്നു കൂടിയാൽ പിന്നെ ആധിയാണ് എല്ലാവർക്കും. പിന്നീടങ്ങോട്ട് പട്ടിണി കിടപ്പും വ്യായാമവുമാണ്. എന്നാലോ തടി കുറയുകയുമില്ല, ക്ഷണിക്കപ്പെടാത്ത അതിഥിയായി രോഗവുമെത്തും.
ഇത്തരത്തിൽ അശാസ്ത്രീയമായ രീതിയിൽ തടി കുറയ്ക്കുന്നവരുടെ എണ്ണത്തിൽ ഗണ്യമായ വർദ്ധനയാണ് റിപ്പോർട്ട് ചെയ്യുന്നത്. എന്നാൽ തടി കുറയ്ക്കുന്നതിന് ആദ്യം വേണ്ടത് ക്ഷമയും ദൃഢനിശ്ചയവുമാണ്. മുന്നൊരുക്കങ്ങൾ ഇല്ലാതെ ഭാരം കുറയ്ക്കുക പ്രയാസമേറിയ കാര്യമാണ്.
അമിതഭാരം കുറയ്ക്കാൻ രണ്ടു കാര്യങ്ങളാണ് പ്രധാനമായി ശ്രദ്ധിക്കേണ്ടത്. ഒന്ന് ആഹാരനിയന്ത്രണം, മറ്റൊന്ന് വ്യായാമം. കൃത്യമായ വൈദ്യപരിശോധനയ്ക്ക് ശേഷം മാത്രമേ ഇത് തുടങ്ങവൂയെന്ന് ആരോഗ്യ വിദഗ്ധർ പറയുന്നു. ബി.പി, കൊളസ്ട്രോൾ, തൈറോയ്ഡ് അളവുകൾ എന്നിവ പരിശോധിച്ചതിന് ശേഷം ഡയറ്റും വ്യായാമവും ആരംഭിക്കാം. വിഷാദം, ഉറക്കക്കുറവ്, തൈറോയ്ഡ് നിലയിലെ അപാകങ്ങൾ എന്നീ പ്രശ്നങ്ങൾ ഉള്ളവരിൽ അമിതവണ്ണം കാണാറുണ്ട്. ഇക്കൂട്ടർ അതിനുള്ള ചികിത്സ തേടണം.പിന്നീട് വേണം തടി കുറയ്ക്കാൻ ശ്രമിക്കാൻ.
ഭാരം കുറയ്ക്കാൻ പലതരം ഡയറ്റുകളുണ്ട്. കൃത്യമായ ധാരണയില്ലാതെ ഇവയൊക്കെ പരീക്ഷിച്ചാൽ തടി കേടാകുമെന്ന കാര്യത്തിൽ സംശയം വേണ്ട. മാസങ്ങളോ വർഷങ്ങളോ എടുത്താണ് ശരീരഭാരം കൂടുന്നത്. ഇങ്ങനെയുള്ള ഭാരം ദിവസങ്ങൾ കൊണ്ട് കുറയ്ക്കാൻ കഴിയില്ല. അത്തരത്തിൽ കുറയ്ക്കുന്നത് അശാസ്ത്രീയമാണ്. ഡയറ്റിങ് എന്നാൽ ആഹാരം കഴിക്കാതിരിക്കലല്ല. ആവശ്യമായ പോഷകങ്ങൾ കൃത്യഅളവിൽ കഴിക്കലാണ്.
ഉയരം, പ്രായം, ഭാരം, ജോലിസ്വഭാവം എന്നിവ കണക്കിലെടുത്ത് വേണം ഡയറ്റിങ്ങ് ആരംഭിക്കാൻ. ഡയറ്റ് പ്ലാനുകൾ സ്വയം തയ്യാറാക്കുന്നത് കൂടുതൽ പ്രശ്നങ്ങൾ സൃഷ്ടിക്കും. ഡയറ്റീഷ്യനെ സമീപിക്കുന്നതാകും ഉചിതം. ഡയറ്റ് പ്ലാനിൽ ശരീരത്തിന് ആവശ്യമായ പോഷകങ്ങൾ അടങ്ങിയിട്ടുണ്ടെന്ന് ഉറപ്പുവരുത്തണം. ഡയറ്റിങ്ങ് ആരംഭിച്ചതിന് ശേഷം കഠിനമായ തലവേദന, ക്ഷീണം, തുടങ്ങിയ പ്രശ്നങ്ങൾ കണ്ടാൽ ചികിത്സ തേടണം.
അമിതമായി വ്യായാമം ചെയ്താൽ അമിതഭാരം കുറയുകയില്ല. ഓരോരുത്തർക്കും അനുയോജ്യമായ വ്യായാമരീതികളുണ്ട്. ട്രെയിനറുടെ സഹായത്തോടെ വ്യായാമം ചെയ്യുന്നതാണ് നല്ലത്. ഓട്ടം, സൈക്ലിങ്, നീന്തൽ തുടങ്ങിയ എയ്റോബിക് വ്യായാമങ്ങളാണ് ഭാരം എളുപ്പത്തിൽ കുറയ്ക്കുക. ഇവ ഹൃദയം, ശ്വാസകോശം എന്നിവയുടെ പ്രവർത്തനം മെച്ചപ്പെടുത്തുകയും ചെയ്യും.
നോൺവെജ് പൂർണമായി ഒഴിവാക്കി തടി കുറയ്ക്കാൻ ശ്രമിക്കുന്നവരാണ് ഭൂരിഭാഗവും. എന്നാൽ നോൺവെജും അമിതഭാരവുമായി കാര്യമായ ബന്ധമില്ലെന്നതാണ് വസ്തുത. കൊഴുപ്പ് കുറയ്ക്കാൻ അന്നജം അടങ്ങിയ ആഹാരമാണ് നിയന്ത്രിക്കേണ്ടത്. ഒരു മാസം പരമാവധി നാല് മുതൽ അഞ്ച് കിലോഗ്രം ഭാരമേ കുറയ്ക്കാവൂ. കുറഞ്ഞ സമയത്തിൽ കൂടുതൽ ഭാരം കുറയ്ക്കുന്നത് അശാസ്ത്രീയമാണ്.
ഭക്ഷണക്രമീകരണവും വ്യായാമവും ചെയ്തിട്ടും ഭാരം കുറഞ്ഞില്ലെങ്കിൽ നിരാശരാകേണ്ട. ചിട്ടകളൊന്നും തെറ്റിക്കുകയും വേണ്ട. കാരണം ശരീരഭാരം കുറയുന്നത് സാവധാനത്തിൽ നടക്കുന്ന പ്രക്രിയയാണ്. തടി കുറയ്ക്കാൻ വിദേശ മാതൃകകൾ സ്വീകരിക്കുന്നതും അപകടകരമാണ്. ശാരീരിക അവസ്ഥകൾ വ്യത്യസ്തമായതിനാൽ വിദേശമാതൃകളെ കൂട്ടുപിടിക്കാതിരിക്കുക.
