എറണാകുളം: വിദ്യാഭ്യാസ സ്ഥാപനങ്ങളിൽ ഞായറാഴ്ച പ്രവൃത്തിദിനമാക്കാനുളള സർക്കാർ നടപടിയ്ക്കെതിരെ കെസിബിസി. സർക്കാരിന്റെ ഉത്തരവിന് വിരുദ്ധമായി ഞായറാഴ്ച വിദ്യാഭ്യാസ സ്ഥാപനങ്ങൾക്ക് കെസിബിസി അവധി പ്രഖ്യാപിച്ചു. ഒക്ടോബർ രണ്ട് ഗാന്ധി ജയന്തി ദിനത്തിൽ അദ്ധ്യാപകരും വിദ്യാർത്ഥികളും സ്കൂളിൽ എത്തി ലഹരിവിരുദ്ധ ബോധവത്കരണ പരിപാടിയിൽ പങ്കെടുക്കാനും, ലഹരിവിരുദ്ധ പ്രതിജ്ഞ ചൊല്ലാനും സർക്കാർ നിർദ്ദേശിച്ചിരുന്നു. ഇതിനെതിരെയാണ് കെസിബിസി രംഗത്തു വന്നിരിക്കുന്നത്.
ഒക്ടോബർ രണ്ടിന് കത്തോലിക്കാരൂപതകളിൽ വിശ്വാസപരിശീലനത്തിന്റെ ഭാഗമായുള്ള പരീക്ഷകൾ നടത്തപ്പെടുന്നതിനാലും, വിശ്വാസപരമായ ആചാരാനുഷ്ഠാനങ്ങളിൽ കത്തോലിക്കരായ കുട്ടികൾക്കും രക്ഷിതാക്കൾക്കും അധ്യാപകർക്കും പങ്കെടുക്കേണ്ടതുള്ളതിനാലും പ്രസ്തുതദിനം സാധാരണപോലെതന്നെ ആചരിച്ച് വിശ്വാസപരമായ കാര്യങ്ങൾക്കുവേണ്ടിമാത്രം നീക്കിവെയ്ക്കേണ്ടതാണെന്ന് കെസിബിസിയുടെ പ്രസ്താവനയിൽ പറയുന്നു. ഇനി മുതൽ ഞായറാഴ്ച പ്രവൃത്തി ദിനമാക്കാനുള്ള സർക്കാർ നിർദ്ദേശങ്ങൾ കത്തോലിക്കാ വിദ്യാഭ്യാസ സ്ഥാപനങ്ങൾ പാലിക്കേണ്ടതില്ല. ഒക്ടോബർ 2 ഞായറാഴ്ച ഗാന്ധിജയന്തി ദിനത്തിൽ അധ്യാപകരും വിദ്യാർത്ഥികളും രക്ഷിതാക്കളും വിദ്യാലയങ്ങളിൽ വന്ന് ലഹരിവിരുദ്ധ ബോധവൽക്കരണപരിപാടി സംഘടിപ്പിക്കണമെന്ന സർക്കാർ നിർദ്ദേശം മറ്റൊരു ദിവസം സമുചിതമായി ആചരിച്ച് സർക്കാരിന്റെ നിർദ്ദേശത്തോട് സഹകരിക്കേണ്ടതുമാണെന്നും കെസിബിസി അറിയിച്ചു.
ഞായറാഴ്ച പ്രവൃത്തി ദിവസം ആക്കാനുള്ള സർക്കാർ തീരുമാനത്തിനെതിരെ നേരത്തെ മലങ്കര ഓർത്തഡോക്സ് സഭയും രംഗത്തുവന്നിരുന്നു.
Comments