വിശാഖപട്ടണം: ആന്ധ്രാപ്രദേശിൽ തെരുവ് നായയെ വെടിവെച്ചുകൊന്ന പാസ്റ്റർ അറസ്റ്റിൽ. അടിവിറവുളപ്പാട് സ്വദേശി ഹാമിൽട്ടൺ (65) ആണ് അറസ്റ്റിലായത്. പ്രദേശവാസികൾ നൽകിയ പരാതിയിലാണ് ഹാമിൽട്ടണെ പോലീസ് അറസ്റ്റ് ചെയ്തത്.
കഴിഞ്ഞ ദിവസമായിരുന്നു തെരുവ് നായയെ പാസ്റ്റർ സ്വന്തം എയർ ഗൺ ഉപയോഗിച്ച് വെടിവെച്ച് കൊന്നത്. പാസ്റ്ററുടെ വീടിന് മുൻപിൽ നിന്ന് തെരുവ് നായ നിർത്താതെ കുരച്ചു. ഇതിനെ ആട്ടിയോടിക്കാൻ ശ്രമിച്ചെങ്കിലും ഫലം കണ്ടില്ല. മാത്രമല്ല ഓടിക്കാൻ ശ്രമിച്ചപ്പോൾ ഹാമിൽട്ടണെ നായ ആക്രമിക്കാൻ വരികയും ചെയ്തു. ഇതോടെ എയർ ഗൺ ഉപയോഗിച്ച് വെടിവെച്ച് കൊലപ്പെടുത്തുകയായിരുന്നു.
സംഭവം കണ്ട പ്രദേശവാസികൾ ഉടനെ പോലീസിൽ പരാതി നൽകി. പരാതിയുടെ അടിസ്ഥാനത്തിൽ മൃഗങ്ങൾക്കെതിരായ കുറ്റകൃത്യങ്ങൾ തടയൽ നിയമപ്രകാരമാണ് ഹാമിൽട്ടണെതിരെ കേസ് എടുത്തിരിക്കുന്നത്. സംഭവത്തിൽ അന്വേഷണം ആരംഭിച്ചതായി പോലീസ് പറഞ്ഞു.
