കണ്ണിനു ചുറ്റുമുള്ള ചർമ്മ സംരക്ഷണം എങ്ങനെ ; ഇതാ നിങ്ങൾ അറിയാതെ പോയ ചില കാര്യങ്ങൾ

നമ്മുടെ ശരീരത്തിലെ ഏറ്റവും ലോലമായ ചർമ്മം കണ്ണുകൾക്ക് ചുറ്റുമുള്ളതാണ്. മുഖത്തിന്റെ മറ്റ് ഭാഗങ്ങളെ അപേക്ഷിച്ച് എണ്ണ ഗ്രന്ഥികളും കൊളാജനും ഈ ഭാഗത്ത് കുറവാണ്. കണ്ണിന് താഴെയുള്ള ചർമ്മം ലോലമായതിനാൽ അകാല വാർദ്ധക്യത്തിന്റെ ആദ്യ ലക്ഷണങ്ങൾ ഇവിടെ പ്രകടമാകാറുണ്ട്. എന്നാൽ ശരിയായ പരിചരണം നൽകിയും , ഭക്ഷണം കഴിച്ചും ഈ ചർമ്മത്തെ എന്നും പ്രസരിപ്പോടെ നമ്മുക്ക് നിലനിർത്താൻ കഴിയും. അതിനുള്ള ചില ടിപ്പുകളാണ് ചുവടെ പറയുന്നത്.

മോയ്‌സ്ചറൈസ് ചെയ്യുക

വളരെ മൃതുലമായിട്ടുള്ള ചർമ്മമാണ് കണ്ണിന് ചുറ്റും ഉള്ളത്. ഈ ഭാഗത്ത് വേഗത്തിൽ ജലാംശം നഷ്ടപ്പെടുന്നു. അതിനാൽ ചർമ്മം വരണ്ടു പോകാനും ഇത് കാരണമാകും. അതിനാൽ തന്നെ സാധാരണയായി നാം ഉപയാഗിക്കുന്ന മോയ്‌സ്ചറൈസറുകൾ ഈ ഭാഗത്ത് ഉപയോഗിക്കരുത്. ഒരോ ചർമ്മത്തെയും അടിസ്ഥാനപ്പെടുത്തിയാകണം ഐ ക്രീമുകളും സെറവും തിരഞ്ഞെടുക്കാൻ. അവ ഉപയോഗിച്ച് നിങ്ങൾക്ക് കണ്ണിന് ചുറ്റും
മോയ്‌സ്ചറൈസ് ചെയ്യാവുന്നതാണ്.

മൃദുലമായ സ്പർശനം

മോയ്‌സ്ചറൈസ് ചെയ്യുമ്പോഴും മസാജ് ചെയ്യുമ്പോഴും ഒരിക്കലും ബലമായി ഈ ചർമ്മത്തിൽ വിരലുകൾ ചലിപ്പിക്കരുത്. അധിക സമ്മർദ്ദം സൂക്ഷ്മമായ വരകൾ ചർമ്മത്തിൽ രൂപപ്പെടുത്തും. അതിനാൽ വളരെ മൃദുവായി വേണം ഈ ഭാഗങ്ങളിൽ സ്പർശിക്കാൻ.

ഉറക്കം

കുറഞ്ഞ ഉറക്കം ചർമ്മത്തിൽ വിളർച്ച ഉണ്ടാക്കുന്നു. ഇത് കണ്ണിന് ചുറ്റും ഇരുണ്ട പാടുകൾ വരാൻ കാരണമാകുന്നു. അത് പോലെ തന്നെ കണ്ണ് തിരുമ്മുന്ന ശീലമുണ്ടെങ്കിൽ അത് നിർത്തുക. അമിതമായി കണ്ണ് തിരുമുന്നത് ചർമ്മ കോശങ്ങളെ ദോഷകരമായി ബാധിക്കും.

മസാജ്

കണ്ണുകൾക്ക് ചുറ്റും മസാജ് ചെയ്യുന്നത് വളരെ നല്ലതാണ്. ഇത് ഇവിടങ്ങളിലെ രക്തയോട്ടം വർദ്ധിപ്പിക്കുന്നു. എന്നാൽ ഓർക്കുക ബലം ഉപയോഗിച്ച് മസാജ് ചെയ്യരുത്.

ഭക്ഷണക്രമം

ആരോഗ്യകരമായ ഭക്ഷണക്രമം വളരെ പ്രധാനമാണ്.ആന്റിഓക്സിഡന്റുകൾ, ബീറ്റാ കരോട്ടിൻ, ധാരാളം ദ്രാവകങ്ങൾ എന്നിവയാൽ സമ്പന്നമായ ഭക്ഷണം നിങ്ങളുടെ ഭക്ഷണത്തിൽ ചേർക്കുക. ഒപ്പം പുകവലിക്കുന്ന ആളാണെങ്കിൽ ഉടൻ തന്നെ അത് ഉപേക്ഷിക്കുക. പുകവലി നിങ്ങളുടെ ചർമ്മത്തിലേക്കുള്ള രക്തയോട്ടം തടസ്സപ്പെടുത്തും .ഇത് വേഗത്തിൽ പ്രായമാകാൻ കാരണമാകും.