ആത്മവിശ്വാസത്തോടെ മഞ്ഞപ്പട; കോച്ചിന്റെ കരുത്തിൽ വിശ്വാസമർപ്പിച്ച് ഈസ്റ്റ് ബംഗാൾ; ഇന്ന് കൊച്ചിയിൽ തീപാറും

കൊച്ചി: ഇന്ത്യൻ സൂപ്പർ ലീഗ് 2022-23 സീസണ് ഇന്ന് കൊച്ചിയിൽ കൊടിയുയരും. ആദ്യ മത്സരത്തിൽ കേരള ബ്ലാസ്റ്റേഴ്സ് എഫ്സി- ഈസ്റ്റ് ബംഗാളിനെ നേരിടും. കഴിഞ്ഞ തവണ റണ്ണർ അപ്പായതിന്റെ ആത്മവിശ്വാസത്തോടെ ഇവാൻ വുക്കോമനോവിച്ചിന്റെ കീഴിൽ വർദ്ധിത വീര്യത്തോടെയാണ് ബ്ലാസ്റ്റേഴ്സ് എത്തുന്നത്. കഴിഞ്ഞ സീസണിൽ നിറം മങ്ങിയ ഈസ്റ്റ് ബംഗാളാകട്ടെ മുൻ ദേശീയ ടീം പരിശീലകൻ സ്റ്റീഫൻ കോൺസ്റ്റന്റൈന്റെ കീഴിലാണ് മത്സരത്തിനിറങ്ങുക.

തുടർച്ചയായി രണ്ടാം സീസണിലും ബ്ലാസ്റ്റേഴ്സിനെ പരിശീലിപ്പിക്കുന്നതിന്റെ ആഹ്ലാദത്തിലാണ് താനെന്ന് ഇവാൻ വുക്കോമനോവിച്ച് വ്യക്തമാക്കുമ്പോൾ പരസ്യമായി പഴയ കാര്യങ്ങൾ വച്ച് വിഴുപ്പലക്കാൻ താൻ തയ്യാറല്ലെന്നായിരുന്നു കോൺസ്റ്റന്റൈന്റെ പരാമർശം. കഴിഞ്ഞ തവണ ഈസ്റ്റ് ബംഗാൾ നേരിട്ട പ്രശ്നങ്ങളെക്കുറിച്ച് ചോദ്യമുയർന്നപ്പോഴായിരുന്നു മറുപടി.ബ്ലാസ്റ്റേഴ്സിനെതിരായ മത്സരത്തിൽ മാത്രമാണിപ്പോൾ ശ്രദ്ധിക്കുന്നത്. ജയിച്ച് മൂന്നു പോയിന്റ് സ്വന്തമാക്കുക എന്നതിലാണ് പ്രധാന ശ്രദ്ധയെന്നും കോൺസ്റ്റന്റൈൻ പറഞ്ഞു.

ഗ്രീക്ക് സ്ട്രൈക്കർ ദിമിത്രിയോസ് ഡയമന്റക്കോസും ഗ്രീക്ക് – ഓസ്ട്രേലിയൻ താരം അപ്പോസ്തലസ് ജിയാനുവും മുന്നേറ്റ നിരയ്‌ക്ക് കരുത്തുകൂട്ടും. കൂടെ കെപി രാഹുലും ബിദ്യാസാഗർ സിംഗും എം.എസ് ശ്രീക്കുട്ടനും. ഉറുഗ്വെ താരമായ അഡ്രിയാൻ ലൂണയ്‌ക്കൊപ്പം യുക്രെയ്ൻ മിഡ് ഫീൽഡർ ഇവാൻ കല്യൂഷ്നി കൂടി ചേരുമ്പോൾ മദ്ധ്യനിര കരുത്തുറ്റതാകുന്നു. പുതുതായി ടീമിലെത്തിയ സൗരവ് മണ്ഡലും ഒപ്പം സഹൽ അബ്ദുൾ സമദും ഇവർക്ക് പിന്തുണ നൽകും.

സ്പാനിഷ് താരം വിക്ടർ മോംഗിൽ പ്രതിരോധക്കോട്ടയിലെ പ്രധാന ഭടനായി ഇക്കുറിയെത്തുന്നത് മറ്റൊരു പ്രത്യേകത. ക്രൊയേഷ്യൻ താരം മാർക്കോ ലെസ്കോവിച്ചിന്റെ പരിചയസമ്പന്നത കൂടിയാകുമ്പോൾ ബ്ലാസ്റ്റേഴ്സ് ഗോൾ മുഖത്തേക്കുള്ള എതിരാളികളുടെ പ്രവേശനം അത്ര എളുപ്പമല്ല. ക്യാപ്ടൻ ജെസൽ കാർണെയ്‌റോയും മുൻ സീസണിലെ താരം ഹോർമിപാം റൂയിവയും മലയാളി താരം ബിജോയും ഗോൾ മുഖത്തിന് കാവലാകും. കഴിഞ്ഞ സീസണിലെ ഗോൾഡൻ ഗ്ലവ് നേടിയ പ്രഭ്സുഖൻ ഗിൽ ഗോൾ വലകാക്കാനുള്ളപ്പോൾ അത്ര എളുപ്പം ബ്ലാസ്റ്റേഴ്സ് വല കുലുങ്ങില്ല. കൂടെ കരൺജിത് സിംഗും സച്ചിൻ സുരേഷും കോച്ചിന്റെ തിരഞ്ഞെടുപ്പിന് കൂടുതൽ അവസരങ്ങൾ നൽകുന്നു.

ഇന്ത്യൻ സാഹചര്യത്തെയും ഇന്ത്യൻ കളിക്കാരേയും ഏറെ പരിചയമുള്ള കോച്ച് സ്റ്റീഫൻ കോൺസ്റ്റന്റൈൻ തന്നെയാണ് ഈസ്റ്റ് ബംഗാളിന്റെ തുറുപ്പ് ചീട്ട്. കരുത്തുള്ള പുതു നിര കോച്ചിനൊപ്പം അണിനിരക്കും.എന്നാൽ ഇതുവരെ ഐ.എസ്.എല്ലിൽ ബ്ലാസ്റ്റേഴ്സിനെ തോൽപ്പിക്കാൻ ഈസ്റ്റ് ബംഗാളിനായിട്ടില്ല. നാലു കളികൾ കളിച്ചപ്പോൾ മൂന്നെണ്ണം സമനിലയായിരുന്നു. കഴിഞ്ഞ സീസണിൽ ഒരു ഗോളിന് ബ്ലാസ്റ്റേഴ്സ് ജയിക്കുകയും ചെയ്തു.

നാളുകൾക്ക് ശേഷം ഐ.എസ്.എൽ കൊച്ചിയിലെത്തുമ്പോൾ ആവേശത്തിലാണ് മഞ്ഞപ്പടയുടെ ആരാധകർ. കേരളം മുഴുവനുള്ള ബ്ലാസ്റ്റേഴ്സിന്റെ ആരാധകർ ഇന്ന് കൊച്ചിയിലേക്ക് ഒഴുകും. ജവഹർലാൽ നെഹ്രു സ്റ്റേഡിയത്തിൽ മഞ്ഞപ്പട അലമാലകൾ തീർക്കുമ്പോൾ കളിക്കളത്തിൽ ജയം കൊണ്ട് സമ്മാനം കൊടുക്കാൻ കഠിന പരിശ്രമത്തിലാണ് ബ്ലാസ്റ്റേഴ്സ്. കഴിഞ്ഞ സീസണിലെ തകർച്ച മറന്ന് പുതിയ തുടക്കത്തിനൊരുങ്ങുകയാണ് ഈസ്റ്റ് ബംഗാൾ. കളി തീപാറും .. തീർച്ച