മലയാളി പ്രേക്ഷകർ ഏറെ ആകാംഷയോടെ കാത്തിരുന്ന മോഹൻലാൽ ചിത്രമാണ് ‘മോൺസ്റ്റർ’. ചിത്രവുമായി ബന്ധപ്പെട്ട വാർത്തകൾ ഏറെ ആവേശത്തോടെയാണ് ആരാധകർ ഏറ്റെടുത്തിരുന്നത്. പുലിമുരുകൻ എന്ന ഹിറ്റ് ചിത്രത്തിന് ശേഷം മോഹൻലാലും വൈശാഖും ഒന്നിക്കുന്ന ചിത്രം കൂടിയാണിത്. ഇപ്പോഴിതാ ചിത്രത്തിന്റെ പുതിയ വിശേഷം പങ്കുവച്ചിരിക്കുകയാണ് മോഹൻ ലാൽ . മോൺസ്റ്ററിന്റെ ട്രെയിലർ പുറത്തുവരുന്നുവെന്ന വിവരമാണ് മോഹൻലാൽ അറിയിച്ചിരിക്കുന്നത്.
ഒക്ടോബർ 9 ഞായറാഴ്ച രാവിലെ പതിനൊന്ന് മണിക്ക് ചിത്രത്തിന്റെ ട്രെയിലർ പുറത്ത് വിടുമെന്നാണ് അറിയിപ്പ്.’ഡെവിളിനെ കാണാനുള്ള കാത്തിരിപ്പിന് ഒടുവിൽ വിരാമമാകുന്നു. മോൺസ്റ്ററിന്റെ ഔദ്യോഗിക ട്രെയിലർ ഈ ഞായറാഴ്ച പുറത്തിറങ്ങുമെന്നതിനാൽ അതീവ ജാഗ്രതയോടെ തുടരുക’, എന്നാണ് ട്രെയിലർ റിലീസ് തിയതി പങ്കുവച്ച് മോഹൻലാൽ കുറിച്ചിരിക്കുന്നത്. ‘ മോഹൻലാലിന്റെ വാക്കുകൾ ആരാധകരെ ആവേശത്തിൽ എത്തിച്ചിരിക്കുകയാണ്.
അതേസമയം ഒക്ടോബർ 21-ന് ദീപാവലി റിലീസായി മോൺസ്റ്റർ എത്തുമെന്നാണ് പുറത്ത് വരുന്ന വിവരം . എന്നാൽ ഇക്കാര്യത്തിൽ ഔദ്യോഗിക വിശദീകരണങ്ങൾ ഒന്നും തന്നെ വന്നിട്ടില്ല. പുലിമുരുകന്റെ ചരിത്ര വിജയത്തിന് ശേഷം മോഹൻലാലും സംവിധായകൻ വൈശാഖും തിരക്കഥാകൃത്ത് ഉദയ് കൃഷ്ണയും ഒന്നിക്കുന്ന ചിത്രമാണ് മോൺസ്റ്റർ. ലക്കി സിംഗ് എന്ന കഥാപാത്രത്തേയാണ് മോഹൻലാൽ ചിത്രത്തിൽ അവതരിപ്പിക്കുന്നത്. ചിത്രത്തിനായി കാത്തിരിക്കുന്നു ലാലേട്ടാ എന്നാണ് ഭൂരിഭാഗം പേരും പോസ്റ്റിന് താഴെ കമന്റ് ചെയ്തിരിക്കുന്നത്.
