തെരുവുനായയ്‌ക്കെന്ത് ക്യാമറമാൻ! സിനിമാ ഷൂട്ടിംഗിനിടെ ക്യാമറമാന്റെ കാലിൽ പട്ടി കടിച്ചു; ഗുരുതര പരിക്ക്

കോഴിക്കോട്: സിനിമാ ചിത്രീകരണത്തിനിടെ ക്യാമറമാനെ തെരുവുനായ കടിച്ചു. പരിക്കേറ്റ അസോസിയേറ്റ് ക്യാമറമാൻ ജോബിൻ ജോൺ മെഡിക്കൽ കോളേജ് ആശുപത്രിയിൽ ചികിത്സ തേടി. കോഴിക്കോട് മേത്തോട്ടുതാഴത്ത് ശനിയാഴ്ച രാത്രി എട്ട് മണിയോടെയാണ് സംഭവം.

ഹരീഷ് പേരടി നിർമ്മിക്കുന്ന ‘വാസുവേട്ടന്റെ സൈക്കിൾ’ എന്ന ചിത്രത്തിന്റെ ഷൂട്ടിംഗായിരുന്നു നടന്നിരുന്നത്. ഇതിനിടെ ക്യാമറ കൈകാര്യം ചെയ്തിരുന്ന ജോബിന്റെ പിറകിലൂടെ വന്ന നായ ആക്രമിച്ചു. ഇദ്ദേഹത്തിന്റെ കാലിനായിരുന്നു കടിയേറ്റത്. പിന്നാലെ നായ ഓടിപോകുകയും ചെയ്തു.

മെഡിക്കൽ കോളേജ് ആശുപത്രിയിൽ നിന്നും കുത്തിവെപ്പെടുത്ത ശേഷം ജോബിൻ ഇപ്പോൾ വിശ്രമത്തിലാണ്. തെരുവുനായയുടെ ആക്രമണം നിയന്ത്രിക്കാൻ സംസ്ഥാനത്ത് പലവിധ പദ്ധതികളും പ്രവർത്തനങ്ങളും സർക്കാരിന്റെ നേതൃത്വത്തിൽ പുരോഗമിക്കുന്നുണ്ടെങ്കിലും പട്ടിയുടെ കടിയേൽക്കുന്നവരുടെ എണ്ണത്തിൽ കുറവ് സംഭവിക്കുന്നില്ലെന്നതാണ് റിപ്പോർട്ടുകൾ സൂചിപ്പിക്കുന്നത്.

കഴിഞ്ഞ ദിവസം ഒരേ നായ തന്നെ 21 പേരെ ഒറ്റദിവസം കടിച്ചിരുന്നു. തിരുവനന്തപുരം വിളവൂർകലിലാണ് ഇതുണ്ടായത്. കൂടാതെ പാലക്കാട് മുൻ എംഎൽഎ കെ.കെ ദിവാകരനും ശനിയാഴ്ച കടിയേറ്റിരുന്നു. എല്ലാവരും ഉടൻ തന്നെ ആശുപത്രിയിൽ ചികിത്സ തേടുകയാണുണ്ടായത്.