മൂന്ന് പെരുമ്പാമ്പുകളെ പാന്റിനുള്ളിൽ ഒളിപ്പിച്ച് കടത്താൻ ശ്രമം; യുവാവ് പിടിയിൽ

പാന്റിനുള്ളിൽ പാമ്പുകളെ ഒളിപ്പിച്ച് കടത്താൻ ശ്രമിച്ച യുവാവ് അറസ്റ്റിൽ. കാനഡയിൽ നിന്ന് മൂന്ന് ബർമീസ് പെരുമ്പാമ്പുകളെ കടത്താൻ ശ്രമിച്ചെന്നാണ് അമേരിക്കൻ പൗരനും 36കാരനുമായ കാൽവിൻ ബൗട്ടിസ്റ്റയ്‌ക്കെതിരെ ആരോപണം ഉയർന്നിരിക്കുന്നത്. യുഎസ്-കനേഡിയൻ അതിർത്തി വഴി ബസിൽ ആയിരുന്നു ഇയാളുടെ യാത്ര. ഇതിനിടെ ചെക്കിംഗിൽ നിന്ന് രക്ഷപെടുന്നതിനായി പാമ്പുകളെ ഇയാളെ പാന്റിനുള്ളിൽ ഒളിപ്പിച്ചുവെന്നാണ് അസോസിയേറ്റഡ് പ്രസ് റിപ്പോർട്ട് ചെയ്യുന്നത്. വളരെ ചെറിയ പാമ്പുകളായിരുന്നു ഇവയെന്നാണ് വിവരം.

മനുഷ്യർക്ക് ഉപദ്രവകരമായ ജീവികളുടെ പട്ടികയിലാണ് ബർമീസ് പൈത്തണുകളെ ഉൾപ്പെടുത്തിയിരിക്കുന്നത്. ഇവയുടെ ഇറക്കുമതി വിവിധ രാജ്യങ്ങൾ നിരോധിച്ചിട്ടുള്ളതുമാണ്. കാൽവിനെതിരെ വിവിധ വകുപ്പുകൾ ചുമത്തിയതിന് ശേഷം അൽബാനിയയിലെ കോടതിയിൽ ഹാജരാക്കി. ഇയാളെ വിശദമായ ചോദ്യം ചെയ്യലിനായി കസ്റ്റഡിയിൽ വിട്ടിരിക്കുകയാണ്. പാമ്പുകളെ കടത്തിയെന്ന ആരോപണം തെളിഞ്ഞാൽ ഇയാൾക്ക് 20 വർഷം വരെ തടവും, 2,50,000 ഡോളർ പിഴയും ലഭിക്കും.

ലോകത്തിലെ ഏറ്റവും വലിയ പാമ്പുകളിൽ ഒന്നാണ് ബർമീസ് പൈത്തണുകൾ. ഏഷ്യയാണ് ഇവയുടെ ജന്മദേശമെന്ന് കരുതപ്പെടുന്നതെങ്കിലും, ഇന്ന് ഏഷ്യൻ രാജ്യങ്ങളിലും ഇവയുടെ എണ്ണം വളരെ കുറവാണ്. ആക്രമണകാരിയായ പാമ്പുകളുടെ ഗണത്തിലാണ് ഇവയെ പെടുത്തിയിരിക്കുന്നത്. മറ്റ് ജീവികളുടെ നിലനിൽപ്പിനെ ഉൾപ്പെടെ ഇവ ബാധിക്കുന്നതിനാലാണിത്.ല