വളരെയധികം പോഷകമൂല്യങ്ങളുള്ള പ്രോട്ടീനും മഗ്നീഷ്യവും അടങ്ങിയിരിക്കുന്ന ഒന്നാണ് കോഴി മുട്ട. ശരീരം പുഷ്ടിപ്പെടുത്താനും, രോഗപ്രതിരോധ ശേഷി വർദ്ധിപ്പിക്കാനും, അസ്ഥികൾക്ക് ബലം വെയ്ക്കാനും, തലച്ചോറിന്റെ വളർച്ചയ്ക്കും മുട്ട ഏറെ സഹായിക്കുന്നുണ്ട്. നഖം, മുടി എന്നിവയുടെ വളർച്ചയ്ക്ക് ആവശ്യമായ പോഷകങ്ങൾ ലഭ്യമാക്കുന്ന അമിനോ ആസിഡ് മുട്ടയിലുണ്ട്. മുട്ടയിലുള്ള അയണിന്റെ സാന്നിധ്യം രക്തത്തിലെ ഓക്സിജൻ വഹിക്കാൻ സഹായിക്കും.
വേഗം ദഹിക്കുന്നതും ഗുണമേന്മയുള്ളതുമായ പ്രോട്ടീനാണ് മുട്ടയിലുള്ളത്. അതുകൊണ്ട് തന്നെ ബോഡി ബിൽഡർമാരുടെ പ്രധാന ആഹാരമാണിത്. എന്നാൽ മുട്ടയുടെ വെള്ളയും മഞ്ഞയും മാത്രമല്ല, അതിന്റെ തോടും ഭക്ഷ്യയോഗ്യമാണെന്ന് പറഞ്ഞാലോ.
മുട്ട കണ്ട് തുടങ്ങിയ കാലം മുതൽ അതിന്റെ തോടെടുത്ത് തൊടിയിലോ മാലിന്യത്തിലോ കളയുന്നതാണ് നാം കണ്ടിട്ടുണ്ടാവുക. എന്നാൽ അത് കഴിക്കാൻ സാധിക്കുമെന്നാണ് ആരോഗ്യവിദഗ്ധർ പറയുന്നത്.
കാൽസ്യം കാർബണൈറ്റ്, പ്രോട്ടീൻ, മറ്റ് ധാതുകൾ എന്നിവയാൽ നിർമ്മിതമാണ് മുട്ടത്തോട്. ഇതിൽ 40 ശതമാനം കാൽസ്യമുണ്ട്. പകുതി തോട് തന്നെ ദിവസേന ആവശ്യമുള്ള കാൽസ്യം നൽകും. എല്ല്, പല്ല് എന്നിവയുമായി ബന്ധപ്പെട്ട അസുഖങ്ങൾ അകറ്റിനിർത്താൻ മുട്ടത്തോടിനെക്കൊണ്ട് സാധിക്കും. പ്രായമാവുമ്പോൾ വരുന്ന ഓസ്റ്റിയോപോറോസിസ് പോലുള്ള അസുഖങ്ങളെയും ഒഴിവാക്കാനാകും.
എന്നാലിത് എങ്ങനെ കഴിക്കും എന്നാണോ എല്ലാവരും ചിന്തിക്കുന്നത്. ഇത് പൊടിയാക്കി കഴിക്കാമെന്നാണ് വിദഗ്ധരുടെ അഭിപ്രായം. മുട്ടത്തോട് തിളപ്പിച്ച് പൊടിച്ച് ഏതെങ്കിലും ഭക്ഷണത്തോടൊപ്പമോ, പാനീയത്തോടൊപ്പമോ കഴിക്കാവുന്നതാണ്. മുട്ടയുടെ തോടിനുള്ളിൽ കാണുന്ന പാട പോലുള്ള ഭാഗവും ഭക്ഷ്യയോഗ്യമാണ്.
മുട്ടയുടെ തോട് ദഹിക്കാൻ പ്രശ്നമാകുമോ എന്നാണ് സംശയമെങ്കിൽ, തെല്ലും ഭയം വേണ്ടതില്ല. കാൽസ്യം ഏറെയുള്ള മുട്ടത്തോട് ദഹിക്കാൻ അധിക സമയം ആവശ്യമില്ല. എന്നിരുന്നാലും ആരോഗ്യപ്രശ്നങ്ങൾ ഉള്ളവർ ഡോക്ടറോട് ചോദിക്കാതെ ഇത് കഴിക്കാൻ പാടില്ല.
