തിരുവനന്തപുരം: അന്ധവിശ്വാസത്തിന് രാഷ്ട്രീയവും മതവും ഉത്തരവാദികളാണെന്ന് കോൺഗ്രസ് നേതാവ് ചെറിയാൻ ഫിലിപ്പ്. കേരളത്തിൽ നവോത്ഥാനത്തെക്കുറിച്ച് കൊട്ടിഘോഷിക്കുന്ന രാഷ്ട്രീയ പാർട്ടികളും മത – സാമുദായിക ശക്തികളുമാണ് അന്ധവിശ്വാസങ്ങൾ പെരുകുന്നതിന് ഉത്തരവാദികളെന്നും അദ്ദേഹം പറഞ്ഞു. ഫേസ്ബുക്ക് പോസ്റ്റിലൂടെയായിരുന്നു ചെറിയാൻ ഫിലിപ്പിന്റെ പ്രതികരണം.
രാഷ്ട്രീയ കക്ഷികളുടെ വോട്ടുബാങ്ക് രാഷ്ട്രീയമാണ് സാമൂഹ്യ വിപത്തായ ദുരാചാരങ്ങളെ വളർത്തുന്നത്. സംഘടിത മതങ്ങൾ തങ്ങളുടെ നിലനിൽപിന് ജനങ്ങളുടെ അന്ധവിശ്വാസങ്ങളെ പ്രോത്സാഹിപ്പിക്കുകയാണ്. രാഷ്ട്രീയ-മത ശക്തികൾ ആത്മ പരിശോധന നടത്തി ഹിംസാത്മകവും ചൂഷണപരവുമായ അന്ധവിശ്വാസങ്ങൾക്കും അനാചാരങ്ങൾക്കുമെതിരെ ശക്തമായ ആശയ പ്രചരണം നടത്തണമെന്നും ചെറിയാൻ ഫിലിപ്പ് ആവശ്യപ്പെട്ടു.
കേരളത്തെ നടുക്കിക്കൊണ്ട് പുറത്തുവന്ന ഇരട്ട ആഭിചാര കൊലകളുടെ വിവരങ്ങളാണ് പ്രതികരണത്തിനാധാരം. അതിക്രൂരമായി കൊല ചെയ്ത് ആഭിചാര ക്രിയകൾ നടത്തിയ മൂന്ന് പേരാണ് പോലീസിന്റെ പിടിയിലായത്. ആദ്യ കൊലപാതകം നടത്തിയതിന് ക്രൂരത കുറഞ്ഞുപോയതിനാൽ വേണ്ടത്ര ഫലം ലഭിക്കില്ലെന്ന് വിലയിരുത്തിയായിരുന്നു രണ്ടാമത്തെ കൊലപാതകം. ഇതിനായി രണ്ട് സ്ത്രീകളെ വശീകരിച്ച് എത്തിച്ച് ആഭിചാര ക്രിയകൾക്ക് ഇരയാക്കുകയായിരുന്നു. ഇരു സ്ത്രീകളുടെയും സാമ്പത്തിക ബുദ്ധിമുട്ടുകൾ മുതലെടുത്താണ് പ്രതികൾ വശീകരിച്ചത്.
