മഞ്ജു വാര്യര് നായികയായി എത്തുന്ന ഇന്തോ-അറബിക് ചിത്രമായ ‘ആയിഷ’യിലെ വീഡിയോ ഗാനം പുറത്ത്. ചടുലമായ നൃത്ത ചുവടുകളുമായാണ് മഞ്ജു വാര്യർ വീഡിയോ ഗാനത്തിൽ നിറഞ്ഞു നിൽക്കുന്നത്. പുറത്തിറങ്ങി നിമിഷങ്ങൾക്കുള്ളിൽ തന്നെ ഗാനം പ്രേക്ഷകർ ഏറ്റെടുത്തു കഴിഞ്ഞു. ‘കണ്ണില് കണ്ണില്’ എന്ന് തുടങ്ങുന്ന ഗാനമാണ് അണിയറ പ്രവർത്തകർ പുറത്തു വിട്ടിരിക്കുന്നത്. ‘ഈ പ്രായത്തിലും എന്നാ എനർജെറ്റിക് പെർഫോമൻസ്’ എന്നാണ് വീഡിയോ ഗാനം കണ്ട പ്രേക്ഷകർ കുറിക്കുന്നത്. പ്രഭുദേവയുടേതാണ് കൊറിയോഗ്രഫി. നീണ്ട ഇടവേളയ്ക്കു ശേഷമാണ് പ്രഭുദേവ ഒരു മലയാള സിനിമയില് നൃത്തസംവിധാനം ചെയ്യുന്നത്.
അഹി അജയൻ ആണ് ഗാനം ആലപിച്ചിരിക്കുന്നത്. ബി.കെ ഹരിനാരായണൻ എഴുതിയ വരികൾക്ക് സംഗീതം നൽകിയിരിക്കുന്നത് എം.ജയചന്ദ്രൻ ആണ്. ഡോ.നൂറ അൽ മർസൂഖിയാണ് ഗാനത്തിന്റെ അറബിക് വെർഷൻ എഴുതിയിരിക്കുന്നത്. റിലിക് ഗാനം ദിവസങ്ങൾക്ക് മുമ്പാണ് അണിയറ പ്രവർത്തകർ പുറത്തു വിട്ടിരുന്നത്. ദിവസങ്ങൾ കഴിഞ്ഞിട്ടും യൂട്യൂബിൽ ട്രെന്റിംഗ് ലിസ്റ്റിൽ തുടരുമ്പോൾ തന്നെയാണ് വീഡിയോ ഗാനവും പുറത്തു വന്നിരിക്കുന്നത്. ചിത്രം ഈ മാസം തിയറ്ററുകളിൽ എത്തുമെന്നാണ് ലഭിക്കുന്ന വിവരങ്ങൾ.
ആമിർ പള്ളിക്കൽ ആണ് ആയിഷ സംവിധാനം ചെയ്യുന്നത്. 7 ഭാഷകളിലായാണ് ചിത്രം ഒരുങ്ങുന്നത്. മലയാളത്തിനു പുറമെ തമിഴ്, തെലുങ്ക്, കന്നഡ, ഹിന്ദി, ഇംഗ്ലീഷ്, അറബിക് ഭാഷകളിലും ചിത്രം പുറത്തിറങ്ങും. ആഷിഫ് കക്കോടിയാണ് ചിത്രത്തിന്റെ രചന. ഇതാദ്യമാണ് മഞ്ജു വാര്യരുടെ ഒരു സിനിമ ഇത്രയും ഭാഷകളിൽ റിലീസ് ചെയ്യുന്നത്. നടി രാധികയും ചിത്രത്തിൽ സുപ്രധാന വേഷത്തിൽ എത്തുന്നു. സജ്ന, പൂര്ണിമ എന്നിവർക്കു പുറമെ ലത്തീഫ (ടുണീഷ്യ), സലാമ (യുഎഇ), ജെന്നിഫര് (ഫിലിപ്പൈന്സ്), സറഫീന (നൈജീരിയ), സുമയ്യ (യമന്), ഇസ്ലാം (സിറിയ) തുടങ്ങിയ വിദേശ താരങ്ങളും ചിത്രത്തിൽ അണിനിരക്കുന്നുണ്ട്. ക്രോസ് ബോര്ഡര് ക്യാമറയുടെ ബാനറില് സക്കറിയയാണ് ചിത്രം നിര്മ്മിക്കുന്നത്.
Comments