പാലക്കാട്: കോൺഗ്രസ് അദ്ധ്യക്ഷ സ്ഥാനത്തേക്ക് നാളെ തിരഞ്ഞെടുപ്പ് നടക്കാനിരിക്കെ, ശശി തരൂരിന് അനുകൂലമായി സംസ്ഥാനത്തിന്റെ വിവിധ ഭാഗങ്ങളിൽ വീണ്ടും ഫ്ലക്സ് ബോർഡുകൾ. കോൺഗ്രസിന്റെ ഔദ്യോഗിക സ്ഥാനാർത്ഥി എന്ന തലത്തിൽ നേതാക്കൾ മല്ലികാർജ്ജുൻ ഖാർഗെക്ക് പിന്തുണ പ്രഖ്യാപിക്കുമ്പോൾ, പാർട്ടിയിൽ ചിലർ തരൂരിന് അനുകൂലമായി നിലപാടെടുക്കുന്നത് കോൺഗ്രസിലെ അന്തച്ഛിദ്രത്തിന് തെളിവായാണ് പലരും ചൂണ്ടിക്കാണിക്കുന്നത്.
പാലക്കാട് നഗരത്തിലാണ് ശശി തരൂരിന് അനുകൂലമായി പുതിയ ഫ്ലക്സ് ബോർഡുകൾ പ്രത്യക്ഷപ്പെട്ടിരിക്കുന്നത്. പാലക്കാട് നഗരത്തിൽ മിഷൻ സ്കൂളിന് സമീപമാണ് ഇവ സ്ഥാപിച്ചിരിക്കുന്നത്. ‘തരൂരിനെ വിജയിപ്പിക്കൂ, കോൺഗ്രസിനെ രക്ഷിക്കൂ‘ എന്ന മുദ്രാവാക്യത്തോടെയാണ് ഫ്ലക്സ് ബോർഡുകൾ പ്രത്യക്ഷപ്പെട്ടിരിക്കുന്നത്. മഹാത്മാ സ്റ്റഡി സെന്റർ പാലക്കാട് ജില്ലാ കമ്മിറ്റിയുടെ പേരിലാണ് ഫ്ലക്സ് ബോർഡുകൾ.
കഴിഞ്ഞ ദിവസം പാലക്കാട് മങ്കരയിലും തരൂരിന് അനുകൂലമായി ഫ്ലക്സ് ബോർഡ് സ്ഥാപിച്ചിരുന്നു. അതിനിടെ കൊല്ലം കൊട്ടാരക്കരയിൽ ശശി തരൂരിന് അനുകൂലമായി സ്ഥാപിച്ച ഫ്ലക്സ് ബോർഡ് നശിപ്പിക്കപ്പെട്ട നിലയിൽ കണ്ടെത്തിയത് വിവാദമായിരുന്നു.
Comments