ഭോപ്പാൽ: ചോക്ലേറ്റ് ഒളിപ്പിച്ചുവച്ച അമ്മയ്ക്കെതിരെ പോലീസ് സ്റ്റേഷനിൽ പരാതി നൽകിയ കുരുന്നിന് മദ്ധ്യപ്രദേശ് ആഭ്യന്തരമന്ത്രി നരോത്തം മിശ്രയുടെ സ്നേഹ സമ്മാനം. മൂന്ന് വയസ്സുകാരന് അദ്ദേഹം സൈക്കിളും ചോക്ലേറ്റുകളും സമ്മാനമായി നൽകി. പോലീസ് സ്റ്റേഷനിൽ അമ്മയ്ക്കെതിരെ പരാതി നൽകാനെത്തിയ കുട്ടിയുടെ വാർത്തകളും ചിത്രങ്ങളും വ്യാപകമായി പ്രചരിച്ചിരുന്നു.
പോലീസുകാർ വഴിയാണ് നരോത്തം മിശ്ര കുട്ടിയ്ക്ക് സമ്മാനം നൽകിയത്. പോലീസുകാർ വീട്ടിൽ നേരിട്ട് എത്തി സൈക്കിൾ കുട്ടിയ്ക്ക് കൈമാറി. സന്തോഷത്തോടെ കുട്ടി സൈക്കിൾ ചവിട്ടുന്നതിന്റെ വീഡിയോ രക്ഷിതാക്കളും ആഭ്യന്തര വകുപ്പും സമൂഹമാദ്ധ്യമങ്ങളിൽ പങ്കുവെച്ചിട്ടുണ്ട്.
ഞായറാഴ്ചയാണ് അമ്മയ്ക്കെതിരെ കുട്ടി പരാതി നൽകാനായി പോലീസ് സ്റ്റേഷനിൽ എത്തിയത്. പിതാവിനൊപ്പം എത്തിയ കുട്ടി തന്റെ ചോക്ലേറ്റുകൾ എല്ലാം അമ്മ ഒളിപ്പിച്ച് വയ്ക്കുകയാണെന്നും അമ്മയെ ജയിലിൽ അടയ്ക്കണമെന്നും പോലീസ് കോൺസ്റ്റബിളായ പ്രിയങ്കാ നായിക്കിനോട് പറയുകയായിരുന്നു. കുട്ടി പറഞ്ഞത് പ്രകാരം പ്രിയങ്ക പരാതി പേപ്പറിൽ പകർത്തി. കുട്ടിയോട് ഒപ്പിടാൻ ആവശ്യപ്പെട്ടപ്പോൾ പേന കൊണ്ട് വരയ്ക്കുക മാത്രമായിരുന്നു ചെയ്തത്. പ്രിയങ്കയുടെ സഹപ്രവർത്തകയാണ് കുട്ടിയുടെ ദൃശ്യങ്ങൾ ഫോണിൽ പകർത്തിയത്. തുടർന്ന് സമൂഹമാദ്ധ്യമത്തിൽ പങ്കുവയ്ക്കുകയായിരുന്നു.
Comments