ന്യൂഡൽഹി: ഹിന്ദു മതവികാരം വ്രണപ്പെടുത്തിയ മുൻ ആഭ്യന്തരമന്ത്രിയ്ക്കെതിരെ നടപടി ആവശ്യപ്പെട്ട് ഹിന്ദു സേന. മുതിർന്ന കോൺഗ്രസ് നേതാവും മുൻ മന്ത്രിയുമായ ശിവരാജ് പാട്ടീലിനെതിരെ കേസെടുക്കണമെന്നാണ് ഹിന്ദു സേനയുടെ ആവശ്യം. മഹാഭാരത യുദ്ധത്തിൽ ഭഗവാൻ കൃഷ്ണൻ അർജുനന് ജിഹാദിന്റെ പാഠങ്ങൾ നൽകിയെന്ന് പാട്ടീൽ പരാമർശിച്ചിരുന്നു. ഇതിന് പിന്നാലെയാണ് വിവിധ ഹിന്ദു സംഘടനകൾ രംഗത്തെത്തിയത്.
കോൺഗ്രസ് നേതാവ് ഖുർആനെ ഭഗവത് ഗീതയുമായി താരതമ്യപ്പെടുത്തിയെന്നും പരാമർശം ഹിന്ദുക്കളുടെ മതവികാരം വ്രണപ്പെടുത്തിയെന്നും ഹിന്ദുസേന പ്രതികരിച്ചിരുന്നു. തുടർന്നാണ് എഫ്ഐആർ രജിസ്റ്റർ ചെയ്യണമെന്ന ആവശ്യവുമായി രംഗത്തെത്തിയത്. ഹിന്ദുക്കളുടെ മതവികാരം ബോധപൂർവം വ്രണപ്പെടുത്തിയതിന് 1863-ലെ ശിക്ഷാ നിയമത്തിലെ 153, 153 എ, 153 ബി, 295 എ, 298 എന്നീ വകുപ്പുകൾ പ്രകാരം കേസെടുക്കണമെന്ന് ഹിന്ദുസേന ആവശ്യപ്പെട്ടു.
കോൺഗ്രസ് പ്രവർത്തകയും മുൻ കേന്ദ്രമന്ത്രിയുമായ മൊഹ്സിന കിദ്വായിയുടെ ജീവചരിത്ര പുസ്തകത്തിന്റെ പ്രകാശന ചടങ്ങിലാണ് മതവികാരം വ്രണപ്പെടുത്തുന്ന തരത്തിലുള്ള പരാമർശമുണ്ടായത്. ജിഹാദിന്റെ ആശയങ്ങൾ ഗീതയിൽ പരാമർശിച്ചിട്ടുണ്ടെന്നും മഹാഭാരത യുദ്ധത്തിൽ ഭഗവാൻ കൃഷ്ണൻ അർജുനന് ജിഹാദിനെക്കുറിച്ചുള്ള പാഠങ്ങൾ നൽകിയെന്നുമാണ് അദ്ദേഹം പറഞ്ഞത്. ജിഹാദ് പരാമർശങ്ങളോട് ബിജെപി ശക്തമായി പ്രതികരിച്ചിരുന്നു. കോൺഗ്രസ് ‘ഹിന്ദു വിദ്വേഷം’ സൃഷ്ടിക്കുകയാണെന്നും ശ്രീരാമന്റെ അസ്ഥിത്വത്തെ എതിർക്കുകയുമാണെന്ന് ബിജെപി വക്താവ് ഷെഹ്സാദ് ജയ് ഹിന്ദ് പ്രതികരിച്ചിരുന്നു.
Comments