തിരുവനന്തപുരം: ലഹരിക്കെതിരെ ദീപം തെളിയിച്ച് പോരാടണമെന്ന മന്ത്രി എം.ബി രാജേഷിന്റെ ആഹ്വാനത്തെ പരിഹസിച്ച് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ. മയക്കുമരുന്നിനെതിരെയുള്ള സംസ്ഥാന സര്‍ക്കാരിന്റെ പ്രചാരണ പരിപാടികളുടെ ഭാഗമായാണ് സംസ്ഥാനത്തെ എല്ലാ വീടുകളിലും ദീപം തെളിയിക്കാൻ മന്ത്രി ആവശ്യപ്പെട്ടത്. കൊറോണയെ പ്രതിരോധിക്കാൻ പോരാളികളായ ആരോഗ്യ പ്രവർത്തകർക്ക് ആദരം നൽകാൻ ദീപം തെളിയിക്കണമെന്ന് പറഞ്ഞ പ്രധാനമന്ത്രി നരേന്ദ്രമോദിയെ മുഹമ്മദ് റിയാസ് അടക്കമുള്ള മന്ത്രിമാർ പരിഹസിച്ചിരുന്നു. എന്നാൽ പരിഹസിച്ചവർ തന്നെ ലഹരിക്കെതിരെ ദീപം തെളിയിക്കാൻ ആവശ്യപ്പെട്ടത് സമൂഹമാദ്ധ്യമങ്ങളിൽ ട്രോളാകുകയാണ്. ഇതിനിടെയാണ് ബിജെപി അദ്ധ്യക്ഷന്റെ പരിഹാസവും.
‘ഞങ്ങൾ വെളിച്ചത്തിന്റെ സ്വിച്ച് ഓഫ് ചെയ്യാൻ തയ്യാറാണ്, നിങ്ങൾ എന്നാണ് നിങ്ങളുടെ തലച്ചോറിലെ വെളിച്ചത്തിന്റെ സ്വിച്ച് ഓൺ ചെയ്യുക? ലഹരിക്കെതിരെയുള്ള പോരാട്ടത്തിൽ ഞങ്ങളുടെ പിന്തുണ ഉറപ്പ്. ലഹരിക്കടത്ത് ആഗോള തലത്തിൽ ഏറ്റെടുത്തു നടത്തുന്ന ഭീകരവാദികളുടെ കാര്യം കൂടി പറയണമെന്നുമാത്രം. പിണറായി ഇട്ടാൽ ബർമുഡ. തലച്ചോറിലെ വെളിച്ചത്തിന്റെ സ്വിച്ച് നിങ്ങൾ തന്നെ ഓൺ ചെയ്യുന്ന ദിവസത്തിനായി കാത്തിരിക്കുന്നു’ എന്നാണ് മന്ത്രി മുഹമ്മദ് റിയാസിന്റെ പോസ്റ്റിലെ വരികൾ പങ്കുവെച്ചു കൊണ്ട് സുരേന്ദ്രൻ പരിഹസിച്ചത്.
മയക്കുമരുന്നിനെതിരെയുള്ള ബോധവത്കരണത്തിന്റെ ഭാഗമായി തിങ്കളാഴ്ച വൈകീട്ട് ആറ് മണിക്ക് സംസ്ഥാനത്തെ എല്ലാ വീടുകളിലും ഞായർ, തിങ്കൾ ദിവസങ്ങളിൽ സംസ്ഥാനത്തെ എല്ലാ ഗ്രന്ഥശാലകളിലും ദീപം തെളിയിക്കാനാണ് എം.ബി.രാജേഷിന്റെ ആഹ്വാനം. ഇതിന്റെ ഭാഗമായി ശനിയാഴ്ച എല്ലാ നിയോജക മണ്ഡലങ്ങളിലും എംഎല്‍എമാരുടെ നേതൃത്വത്തില്‍ ലഹരിക്കെതിരെ ദീപം തെളിയിക്കുകയും ചെയ്തിരുന്നു.
