കണ്ണൂർ: തലശ്ശേരിയിൽ കാറിൽ ചാരി നിന്നതിന്റെ പേരിൽ യുവാവ് ചവിട്ടി താഴെയിട്ട കുട്ടിയെ മറ്റെരാളും മർദ്ദിച്ചു. മുഹമ്മദ് ഷിഹാദിന് മുൻപ് കുട്ടിയെ മറ്റൊരു വഴിപോക്കൻ ഉപദ്രവിക്കുന്നതിന്റെ സിസിടിവി ദൃശ്യങ്ങൾ പുറത്ത്. സംഭവത്തിൽ അന്വേഷണം ആരംഭിച്ചു.
കുട്ടിയ്ക്ക് ചവിട്ടേൽക്കുന്നതിന് മുൻപുള്ള ദൃശ്യങ്ങളാണ് പുറത്തുവന്നിരിക്കുന്നത്. കാറിനുള്ളിലേക്ക് നോക്കി നിൽക്കുകയായിരുന്നു ആറ് വയസ്സുകാരൻ ഗണേശ്. ആ സമയം അതുവഴി വന്നയാൾ ഇത് കണ്ടു. തുടർന്ന് കുട്ടിയുടെ തലയ്ക്ക് അടിക്കുകയായിരുന്നു. തുടർന്ന് കുട്ടിയുടെ കഴുത്തിൽ പിടിച്ച് തള്ളുന്നതും ദൃശ്യങ്ങളിൽ കാണാം. എന്നാൽ പിടിച്ചു മാറ്റിയിട്ടും കുട്ടി വാഹനത്തിന് അടുത്തേക്ക് പോകുകയായിരുന്നു. ഇതിന് പിന്നാലെയാണ് മുഹമ്മദ് ഷിഹാദ് ഗണേശിനെ ചവിട്ടിയത്.
അതേസമയം ചവിട്ടുന്നതിന് പുറമേ ഷിഹാദ് കുട്ടിയുടെ തലയ്ക്കടിക്കുന്ന ദൃശ്യങ്ങളും പുറത്തുവന്നിട്ടുണ്ട്. കാറിൽ ചാരി നിൽക്കുകയായിരുന്ന കുട്ടിയെ പുറത്തിറങ്ങി വന്ന ഷിഹാദ് ആദ്യം ഭയപ്പെടുത്തുകയായിരുന്നു. ഇതിന് പിന്നാലെ കുട്ടിയുടെ തലയ്ക്ക് അടിച്ചു. എന്നാൽ കുട്ടി അവിടെ തന്നെ നിന്നതോടെ ഷിഹാദ് ചവിട്ടുകയായിരുന്നു.
Comments