ന്യൂഡൽഹി : ജി20 ഉച്ചകോടിയിൽ ഇന്ത്യയ്ക്ക് ലഭിക്കുന്ന അദ്ധ്യക്ഷസ്ഥാനം അഭിമാനകരമെന്ന് പ്രധാനമന്ത്രി നരേന്ദ്ര മോദി. രാജ്യം 75 ാം സ്വാതന്ത്ര്യവാർഷികം ആഘോഷിക്കുന്ന ഈ വേളയിൽ ഇന്ത്യയ്ക്ക് ലഭിക്കുന്ന ഈ അംഗീകാരം നിർണായകമാണ്. ജി20 യുടെ ലോഗോയും തീമും വെബ്സൈറ്റും അനാച്ഛാദനം ചെയ്ത ശേഷം സംസാരിക്കുകയായിരുന്നു പ്രധാനമന്ത്രി.
‘ഒരു ഭൂമി, ഒരു കുടുംബം, ഒരു ഭാവി’ എന്നതായിരിക്കും ജി20 അദ്ധ്യക്ഷപദവിയുടെ മന്ത്രമെന്ന് പ്രധാനമന്ത്രി പറഞ്ഞു. ‘ഒരു സൂര്യൻ, ഒരു ലോകം, ഒരു ഗ്രിഡ് എന്ന ഊർജ്ജ വിപ്ലവത്തിന് ഇന്ത്യ നേതൃത്വം നൽകി. ഒരു ഭൂമി, ഒരു ആരോഗ്യം എന്ന ആഗോള ആരോഗ്യ സംരംഭത്തെ ഇന്ത്യ ശക്തിപ്പെടുത്തി. ഇനി ജി 20 യുടെ തീം ഒരു ഭൂമി, ഒരു കുടുംബം, ഒരു ഭാവി എന്നായിരിക്കും,” പ്രധാനമന്ത്രി വ്യക്തമാക്കി.
ഇന്ത്യയ്ക്ക് ജി 20 പ്രസിഡൻസി ലഭിച്ച ചരിത്രപരമായ അവസരത്തിൽ രാജ്യത്തെ അഭിനന്ദിക്കുന്നുവെന്ന് അദ്ദേഹം പറഞ്ഞു. ‘വസുധൈവ കുടുംബകം’ എന്നത് ലോകത്തോടുള്ള ഇന്ത്യയുടെ സ്നേഹത്തിന്റെയും അടയാളമാണ്. ലോകത്തെ ഒരുമിച്ച് കൊണ്ടുവരുന്നതിലുള്ള രാജ്യത്തിന്റെ സാംസ്കാരിക പൈതൃകവും വിശ്വാസവുമാണ് താമര കൊണ്ട് അർത്ഥമാക്കുന്നത്.
ഇന്ത്യയെ മുന്നോട്ട് കൊണ്ടുപോകുന്നതിന് വേണ്ടി രാജ്യത്തെ ജനങ്ങൾ നടത്തിയ പരിശ്രമങ്ങളെയും മുൻ സർക്കാരുകളുടെ പ്രവർത്തനങ്ങളെയും പ്രധാനമന്ത്രി അഭിനന്ദിച്ചു. സ്വാതന്ത്ര്യം ലഭിച്ചതിന് ശേഷം ഞങ്ങൾ വികസനത്തിന്റെ ഉയരങ്ങളിലേക്കുള്ള ഒരു യാത്ര ആരംഭിച്ചു. കഴിഞ്ഞ 75 വർഷത്തെ എല്ലാ സർക്കാരുകളും എല്ലാ പൗരന്മാരും ഇന്ത്യയെ മുന്നോട്ട് കൊണ്ടുപോകാൻ പരിശ്രമിച്ചുവെന്ന് പ്രധാനമന്ത്രി വ്യക്തമാക്കി.
