അഡ്ലെയ്ഡ്; ക്രിക്കറ്റിൽ നിരവധി നേട്ടങ്ങൾക്ക് അർഹനാണ് മുൻ ഇന്ത്യൻ നായകൻ വിരാട് കോഹ്ലി. ടി 20 ക്രിക്കറ്റിൽ മറ്റൊരു റെക്കോർഡിന് ഉടമയായിരിക്കുകയാണ് ഇപ്പോൾ കിങ് കോഹ്ലി. അന്താരാഷ്ട്ര ടി 20യിൽ 4,000 റൺസ് നേടുന്ന ആദ്യ താരമെന്ന നേട്ടമാണ് കോഹ്ലി സ്വന്തമാക്കിയത്. ടി 20 ലോകകപ്പിൽ ഇംഗ്ലണ്ടിനെതിരെയാണ് വിരാട് അന്താരാഷ്ട്ര ക്രിക്കറ്റിലെ മറ്റൊരു നാഴികക്കല്ല് പിന്നിട്ടത്.
ഇംഗ്ലണ്ടിനെതിരെ 40 പന്തുകളിൽ നിന്നായി 50 റൺസാണ് കോഹ്ലി നേടിയത്. നാല് ബൗണ്ടറികളുടെയും ഒരു സിക്റും അടങ്ങുന്നതായിരുന്നു ഇന്നിംഗ്സ്. സ്കോർ 42ൽ എത്തിയപ്പോഴാണ് 4000 തികഞ്ഞത്. ലോകകപ്പിൽ നിലവിൽ ഏറ്റവും കൂടുതൽ റൺസ് നേടിയ താരമാണ് കോഹ്ലി. അദ്ദേഹം ആറ് കളികളിൽ നിന്നായി 136.40 സ്ട്രൈക്ക്റേറ്റോടെ 296 റൺസ് നേടി. നാല് അർധസെഞ്ച്വറികൾ നേടിയ താരത്തിന്റെ ശരാശരി 98.66 ആണ്. ടി20യിൽ കൂടുതൽ റൺസ് നേടിയ ശ്രീലങ്കൻ മുൻ നായകൻ മഹേല ജയവർധനയെ കോഹ്ലി നേരത്തെ മറികടന്നിരുന്നു.
Comments