തങ്ങളുടെ പുതിയ Q8 ഇ-ട്രോൺ ഇലക്ട്രിക് എസ്യുവി ഉടൻ ഇന്ത്യയിൽ അവതരിപ്പിക്കുമെന്ന് ജർമ്മൻ വാഹന നിർമ്മാതക്കളായ ഓഡി. ഓഡി Q8 ഇ-ട്രോൺ കഴിഞ്ഞയാഴ്ചയാണ് ആഗോളതലത്തിൽ അരങ്ങേറ്റം കുറിച്ചത്. ഇപ്പോൾ, ഇലക്ട്രിക് എസ്യുവി ഉടൻ ഇന്ത്യയിൽ എത്തുമെന്നും നിർമ്മാതാവ് വെളിപ്പെടുത്തിയിരിക്കുകയാണ്. ഓഡിയുടെ ഇവി ലൈനപ്പിലെ ഇ-ട്രോണിനും ഇ-ട്രോൺ സ്പോർട്ട്ബാക്കിനും പകരമാണ് Q8 ഇ-ട്രോൺ വരുന്നത്.
മൂന്ന് വകഭേദങ്ങളിലാണ് Q8 ഇ-ട്രോൺ ഇലക്ട്രിക് എസ്യുവി കമ്പനി വാഗ്ദാനം ചെയ്യുന്നത്. ഇ-ട്രോൺ 50, ഇ-ട്രോൺ 55, ഇ-ട്രോൺ എസ് എന്നിങ്ങനെയുള്ള സ്പോർട്ട്ബാക്ക് ബോഡി ശൈലികളിലാണ് എസ്യുവി വരുന്നത്. നിരവധി ഡിസൈൻ മാറ്റങ്ങളോടെയാണ് വാഹനം എത്തുന്നത്. പുനർരൂപകൽപ്പന ചെയ്ത ഗ്രില്ലും എയർ ഡാമും ഉൾപ്പെടെ മുൻവശത്ത് ചില മാറ്റങ്ങൾ വരുത്തിയിരിക്കുന്നു. കൂടാതെ പിന്നിൽ പുതിയ എൽഇഡിബാറുകളും കമ്പനി നൽകിയിട്ടുണ്ട്.
ഡ്യുവൽ മോട്ടോർ, ട്രിപ്പിൾ മോട്ടോർ പതിപ്പുകളിൽ Q8 ഇ-ട്രോൺ ലഭ്യമാണ്. ഇ-ട്രോൺ 50-ന് 334 ബിഎച്ച്പി കരുത്തും 664 എൻഎം ടോർക്കും, ഇ-ട്രോൺ 55-ന് 402 ബിഎച്ച്പി കരുത്തും 664 എൻഎം ടോർക്കും ലഭിക്കുന്നു. അടിസ്ഥാന വേരിയന്റിന് 509 കിലോമീറ്റർ റേഞ്ച് വാഗ്ദാനം ചെയ്യുന്ന 89 kWh ബാറ്ററി പായ്ക്കുണ്ട്. ഇ-ട്രോൺ 55 വേരിയന്റിന് 106 kWh ബാറ്ററിയും ലഭിക്കുന്നു. ഇത് ഒറ്റ ചാർജിൽ 600 കിലോമീറ്റർ വരെ സഞ്ചരിക്കും. ടോപ്പ്-സ്പെക്ക് ഇ-ട്രോൺ എസിന് മൂന്ന് ഇലക്ട്രിക് മോട്ടോറുകൾ നൽകുന്നു. 496 ബിഎച്ച്പി കരുത്തും 973 എൻഎം ടോർക്കും ഇ-ട്രോൺ എസിന് ലഭിക്കുന്നു. 513 കിലോമീറ്റർ റേഞ്ച് വാഗ്ദാനം ചെയ്യുന്ന 106 kWh ബാറ്ററിയാണ് ടോപ്പ്-സ്പെക്ക് ഇ-ട്രോൺ എസിന്.
